O Concello de Santiago e a Asociación Española Contra o Cancro (AECC) presentaron este martes unha nova edición do programa ‘Rutas Saudables 2025-2026’, unha iniciativa que busca promover hábitos de vida activa entre a veciñanza e combater o sedentarismo, un dos principais factores de risco para a saúde segundo a Organización Mundial da Saúde (OMS).
A concelleira María Rozas, acompañada de Nerea Arceo, integrante da xunta local da AECC, e da psicóloga Patricia Baños, destacou que o proxecto “combina actividade física, benestar emocional e convivencia comunitaria”, permitindo “tecer lazos entre persoas doentes de cancro, as súas familias e amizades”. Rozas lembrou tamén que “o exercicio físico é clave non só na prevención do cancro, senón tamén durante o tratamento e a recuperación dos pacientes”.
As rutas, abertas a todas as persoas maiores de 16 anos, terán lugar cada quince días os martes ás 11:00, e estarán guiadas por voluntariado da asociación, que ofrecerá acompañamento e orientación aos participantes. Os percorridos inclúen espazos emblemáticos como o Parque Eugenio Granell, o Parque de Belvís, a Carballeira de San Lourenzo ou a zona de San Lázaro, entre outros.
A primeira camiñada será o martes 14 de outubro, e terá unha duración aproximada de entre 60 e 90 minutos. A actividade é gratuíta, pero require inscrición previa por motivos de organización e para realizar unha avaliación de saúde inicial e final que permita comprobar a mellora dos participantes.
Nerea Arceo subliñou que o programa forma parte do Plan 2 Millóns, impulsado pola AECC e o Clúster do Deporte Galego, que ten como meta incrementar os niveis de actividade física de dous millóns de galegos e galegas. A entidade traballa, segundo explicou, nun triplo compromiso: “previr o cancro mediante hábitos saudables, acompañar pacientes e familiares durante a enfermidade e apoiar a investigación oncolóxica”.
Pola súa parte, Patricia Baños incidiu en que estas camiñadas “pretenden ser un punto de encontro para quen queira iniciarse na actividade física, pero non sabe por onde empezar”, ofrecendo un espazo seguro, guiado e socialmente enriquecedor.
As persoas interesadas poden inscribirse na sede da AECC en Santiago, situada na Avenida de Barcelona, número 29 (Santa Marta), chamando ao teléfono 981 576 479 ou escribindo ao correo santiago.compostela@contraelcancer.es.
Rozas concluíu agradecendo o labor da asociación, que cualificou de “imprescindible” para acompañar a pacientes e familias, promover a prevención e “manter viva a esperanza grazas á investigación”.
