O Partido Popular de Santiago denunciou que numerosas actividades da rede de Centros Socioculturais non se están realizando esta semana debido á ausencia de monitores. O concelleiro José Ramón de la Fuente sinalou que “moitas das programacións habituais non deron comezo porque os profesionais non se presentaron a dirixilas”, e cualificou a situación de “novo episodio de despropósitos na xestión do BNG e Compostela Aberta”.
Segundo explicou o edil, esta situación afecta “a gran parte dos locais e das actividades ofrecidas, programadas e mesmo pagadas polos usuarios”, e atribúea á “falta de monitores dispostos a prestar os servizos polas condicións actuais dos contratos”. De la Fuente lembrou que o PP leva “desde 2023 advertindo que os contratos non están dimensionados ás necesidades reais, nin técnica nin economicamente”, o que estaría a provocar “un progresivo deterioro da calidade do servizo e, agora, a súa suspensión”.
O representante popular afirmou que xa daquela o seu grupo solicitara “a licitación dun novo contrato” que atendese tanto ás necesidades dos usuarios como ás reivindicacións dos traballadores, pero que “o goberno nacionalista optou por prorrogar varias veces os contratos, agravando a situación”.
De acordo co seu relato, a suspensión das actividades xerou malestar entre os usuarios, que “non foron avisados” e se atoparon cos centros pechados ou sen monitor. “Moitos fixeron inscricións para este trimestre sen recibir ningunha notificación, nin confirmación de matrícula, e tampouco obtiveron resposta nas instalacións”, engadiu.
De la Fuente indicou que “empresas e traballadores advertiron da imposibilidade de continuar o servizo”, e que “a falta de resposta do Concello” derivou nun problema que afecta tamén ás condicións laborais do persoal. O edil lembrou que, “no último Pleno, xa advertimos do que ía pasar e pedimos á alcaldesa que se implicase persoalmente, pero non quixo facelo e mantivo o apoio ao concelleiro responsable”.
Finalmente, o PP compostelán esixe á alcaldesa Goretti Sanmartín o cesamento do concelleiro de Centros Socioculturais e que “asuma directamente a xestión do departamento” para garantir o funcionamento das actividades e devolver as cantidades cobradas aos usuarios que non puideron participar, ademais de proceder á licitación inmediata dos contratos.
