A mobilización deste domingo en Santiago de Compostela congregou 80.000 persoas, segundo a organización (15.000 segundo a Policía Local), nunha marcha convocada baixo o lema “Galiza con Palestina, dous anos de xenocidio, 77 anos de ocupación”. A columna partiu da Alameda arredor das 12:00 e percorreu as rúas do centro histórico ata desembocar na Praza do Obradoiro, con consignas a favor do recoñecemento internacional e a fin da ocupación.
Dende a organización, a Coordinadora Galega de Solidaridade con Palestina, Óscar Baladares sinalou que “o xenocidio é só unha fase, son 77 anos de ocupación e, por tanto, hai que continuar mobilizando ao pobo galego para dar resposta”. Pola súa banda, Sami Ashour resumiu as demandas da convocatoria: “O que reclamamos é que termine a ocupación de Palestina e que os palestinos teñan o seu estado libre e independente, que teñan os seus dereitos como calquera outro pobo e que vivan en paz e en dignidade”.
A marcha contou coa presenza de representantes políticos. A portavoz nacional do BNG, Ana Pontón, cualificou a participación cidadá como “unha lección de dignidade” e afirmouno como un chamamento “para parar o xenocidio”. Pontón engadiu que “os galegos e galegas saen hoxe ás rúas para falar por todo o pobo palestino que non pode facelo, por todas aquelas persoas sepultas baixo as bombas e os cascallos, por todos os nenos que non tiveron infancia”, e pediu que “o Goberno do Estado e a UE rompan todo tipo de relacións con Israel”.
Dende o PSdeG, o seu secretario xeral José Ramón Gómez Besteiro apelou a “tomar unha posición responsable” e a loitar “contra o silencio e a indiferenza”. “É un momento no que non podemos permanecer indiferentes. Non cabe a indiferenza, senón situarse e lanzar un clamor en favor da paz, da liberdade e da xustiza”, afirmou, chamando a “pór fin ao barbarismo” e a “loitar por unha sociedade máis xusta e solidaria”.
Tamén participou o secretario xeral de Sumar Galicia, Paulo Carlos López, quen destacou a “asistencia masiva” e definiu a imaxe da xornada como “unha Galicia viva, que apoia a causa palestina”.“Rexeitamos de maneira clara o esforzo imperialista do Goberno sionista xenocida, que busca inviabilizar a solución dos dous estados”, sinalou López, que ademais sentenciou que “o sitio de Netanyahu é ante a Corte Internacional”. Así mesmo, expresou o rexeitamento de Sumar ao chamado plan de paz dos Estados Unidos ao que cualificou de “delirio imperialista”.
