A agrupación UCIN Ames denunciou a situación “deficitaria” que atravesa o Centro de Saúde do Milladoiro, un núcleo que supera os 15.000 habitantes e que tamén atende a veciños e veciñas das parroquias próximas. A formación considera que o crecemento demográfico da zona fai imprescindible reforzar os servizos sanitarios e rematar co que cualifican como unha situación de “abandono”.
O coordinador de UCIN Galicia, José Luis Calo, lembrou que o actual centro “naceu con carencias e segue sen cubrir as necesidades básicas da veciñanza”. “É inxusto que un núcleo tan importante non conte cun Punto de Atención Continuada (PAC). Pedimos máis medios, máis persoal e que se trate ao Milladoiro coa dignidade que merece”, afirmou.
Entre as medidas urxentes que reclama o partido figuran a creación dun PAC con servizo de urxencias, o incremento de persoal médico e pediátrico, a mellora dos accesos e das zonas de estacionamento, así como a limpeza dos terreos exteriores, que segundo denuncian se atopan “cheos de maleza e sen coidado”.
UCIN critica tamén as “promesas incumpridas” das administracións autonómica e municipal, ás que acusa de non materializar as melloras anunciadas. “Non pedimos nada extraordinario, senón sentido común. Se outros concellos con menos poboación teñen PAC, por que aquí non?”, cuestionou Calo, lembrando que “a sanidade pública é un dereito e non un privilexio”.
A formación amesá comprométese a seguir dando voz ás demandas da veciñanza e reclama que tanto o Goberno local como a Xunta de Galicia actúen de forma inmediata para garantir unha atención sanitaria de calidade no Milladoiro.
