A Cidade da Cultura acolleu esta mañá a apertura da primeira edición do Congreso Internacional de Medicina Clínica (CIMEC), promovido pola Comunidade Médica en Formación e apoiado polo Instituto de Investigación Sanitaria de Santiago (IDIS) e a Universidade de Santiago de Compostela (USC). Baixo o lema “Formar hoxe ao médico de mañá”, o evento reunirá en dous días a máis de 700 estudantes, médicos e profesionais de todo o Estado, con relatorios de especialistas de prestixio internacional.
A mesa inaugural contou coa presenza do conselleiro de Sanidade, Antonio Gómez Caamaño, quen destacou que “Galicia é un bo sitio para formarse e traballar”, lembrando que a comunidade ofrece 682 prazas de formación sanitaria especializada e estreará este ano a residencia en Medicina de Urxencias. Tamén interveu a directora do IDIS, Isabel Lista García, que puxo en valor a investigación traslacional como motor para levar os avances científicos á práctica clínica. Pola súa banda, o decano de Medicina da USC, José Carreira Vilamor, subliñou a importancia de iniciativas que fortalezcan a docencia e a implicación da comunidade universitaria.
O congreso abriu o seu programa coa conferencia do bioquímico Mariano Barbacid, referente internacional na investigación oncolóxica. Seguíronlle relatorios do endocrinólogo Manel Puig e do cardiólogo Josep Brugada, especialista en arritmias. Xa pola tarde, será a quenda do hepatólogo Jorge Quiroga e da experta en medicina deportiva Raquel Blasco.
O programa inclúe un total de dez conferencias maxistrais, con figuras como Ángel Carracedo, Verónica Casado, Miguel Sanmamed, Michel Kahaleh e Magda Campins, ademais de obradoiros prácticos e sesións científicas abertas a estudantes e residentes, con premios ás mellores comunicacións. Entre os temas previstos destacan o maneixo integral do paciente complexo, a medicina baseada na evidencia, a inmunoterapia ou os avances en cancro de páncreas, situando a Compostela como punto de encontro internacional para o debate sobre o futuro da medicina clínica.
