O Grupo Municipal Socialista de Santiago reclamou hoxe ao goberno local a celebración dunha comisión de seguimento para avaliar o grao de cumprimento dos orzamentos de 2024 e 2025. A petición fora presentada o pasado 17 de setembro e, segundo a concelleira Marta Abal, o obxectivo é coñecer tanto a execución dos acordos recollidos como a fiabilidade das previsións de ingresos, paso previo á negociación das contas de 2026.
Abal fixo fincapé na necesidade de analizar con detalle proxectos como o novo contrato de transporte público, o ciclo integral da auga, o aparcadoiro do Clínico ou o investimento comprometido no rural. “Non é un cheque en branco, necesitamos ver os puntos exactos nos que se atopan os proxectos estratéxicos que son para a cidade”, afirmou.
A concelleira tamén expresou a súa preocupación pola situación interna do Concello, lembrando que seguen sen cubrirse prazas de procesos selectivos de mandatos anteriores e que non se convocaron as ofertas de emprego de 2023, 2024 e 2025. Ademais, sinalou as dúbidas xeradas por un recente comunicado interno do órgano de xestión orzamentaria, no que se indica que calquera modificación contable debe contar coa súa autorización previa. “Non sabemos moi ben a que se debe, e temos dúbidas de se se produciu algún tipo de actuación administrativa ou política que afecte á integridade municipal”, apuntou.
No apartado financeiro, Abal advertiu que parte dos ingresos previstos para 2025 —2,86 millóns pola taxa turística e 5,5 millóns polas novas licenzas de taxi— non chegarán a materializarse. “A alcaldesa veu a recoñecer que o proceso é máis lento do esperado”, explicou, polo que pediu que a comisión de seguimento aborde tamén este punto.
O voceiro socialista, Gumersindo Guinarte, centrou a súa intervención no ciclo integral da auga, asegurando que o Concello non conta cos recursos necesarios para afrontar en solitario os investimentos urxentes. “A solución terá que vir dalgunha outra fórmula”, dixo, deixando aberta a posición socialista a diferentes opcións “sempre que permitan executar de inmediato as inversións precisas”.
Guinarte incidiu en que a súa postura non responde a cuestións ideolóxicas, senón prácticas: “O que importa é asegurar que o servizo se preste con niveis aceptables de calidade o máis pronto posible. Aquí non estamos falando de ideoloxías, senón de solucionar problemas reais”. Lembrou ademais que concellos de distintas cores políticas, como Pontevedra ou Carballo, optaron por procedementos similares.
En relación coa taxa do lixo, o voceiro socialista reiterou que a súa posición é clara: “Primeiro mellorar a prestación e facer cumprir á concesionaria o contrato. O plantexamento do goberno pareceunos profundamente inoportuno”.
Por último, Guinarte rexeitou de forma expresa a hipótese dunha moción de censura apoiada polo PSdeG: “O Partido Popular sabe perfectamente que o Partido Socialista non vai estar nunha operación de moción de censura en Santiago para promover un goberno de dereitas”.
