O Consello Municipal de Saúde de Santiago aprobou un acordo no que insta á Xunta de Galicia a cubrir todas as prazas vacantes na Unidade Municipal de Atención a Drogodependencias (UMAD), tanto as derivadas de baixas laborais como as motivadas por xubilacións.
A proposta foi defendida pola representante Pilar Lueiro, quen subliñou que a unidade presta un servizo sanitario fundamental a un total de 42 concellos da área sanitaria compostelá. O texto acordado lembra que, por tratarse de persoal especialista do ámbito da saúde, “as prazas deben ser cubertas desde o Servizo Galego de Saúde, como pasa noutras áreas sanitarias do noso país”.
No documento, o Consello de Saúde fai referencia á decisión anunciada pola Xunta de transferir as UAD ao Sergas a partir de 2026, pero reclama que mentres non se faga efectivo ese traspaso se garanta a continuidade da atención.
“Solicitamos que a Consellería de Sanidade proceda á cobertura das prazas vacantes por baixa ou xubilación que se lle teñen notificado de forma inmediata para causar a menor disrupción posible na prestación do servizo”, recolle o acordo aprobado.
