A sección sexta da Audiencia Provincial da Coruña, con sede en Santiago de Compostela, absolveu ao maître dun restaurante da capital galega dos delitos de acoso e agresión sexual dos que estaba acusado por non ter resultado probados. Segundo se recolle na sentenza, o tribunal explica que a proba de cargo practicada no xuízo “non resultou suficiente para enervar a presunción de inocencia do acusado”. “Tras examinar as versións contraditorias das acusacións e a defensa e ponderar as probas practicadas, non se poden considerar acreditados, máis aló de toda dúbida razoable, o feitos polos que se formulou acusación”, destacan os maxistrados no fallo.
Na sentenza, a Sala indica que a declaración da denunciante “presentou certas fluctuacións ao relatar as supostas relacións sexuais non consentidas –negadas polo acusado–“. A iso, engade que, “á marxe das contradicións sinaladas, a declaración só estivo apoiada por corroboracións periféricas, sen carácter obxectivo nin externo ás súas manifestacións“. En canto ás declaracións testificais propostas pola acusación e o resto das partes, os maxistrados afirman que “ofreceron moi pouco valor corroborativo respecto do feitos obxecto de acusación”, xa que teñen como basee o que a denunciante “lles contou”. A Audiencia destaca que son “probas de referencia”, pois “ningún deles apreciou directamente os feitos denunciados”.
Sobre o informe do Imelga, os xuíces sinalan que “non é unha proba obxectiva da realidade dos feitos”, á vez que indican que o seu contido “se funda na versión ofrecida pola denunciante, que non está apoiada polas evidencias achegadas por ela mesma á causa”. Así mesmo, o tribunal afirma no fallo que a proba documental remitida “tamén carecía de signo incriminatorio” e subliña que nela “se aprecian lagoas, ao non achegarse o contido íntegro das conversacións entre vítima e acusado a través de WhatsApp“. Así, recalca que “se achegou un contido parcial e pouco relevante”. A sentenza non é firme, xa que contra ela cabe presentar recurso ante o TSXG.
