O Concello de Boqueixón puxo en marcha os traballos de acondicionamento da Casa da Cultura de Camporrapado, cun orzamento próximo aos 45.000 euros. O alcalde, Ovidio Rodeiro Tato, explicou que a intervención permitirá contar cun “espazo máis seguro, funcional e moderno para toda a veciñanza”.
As actuacións céntranse en dous ámbitos principais. Por unha banda, realizarase a reparación da cuberta, coa limpeza e arranxo de canalóns e baixantes para evitar filtracións de auga. Por outra, acometeranse melloras no auditorio, onde se instalará un novo pavimento continuo e acústico sobre o escenario, ademais da reubicación do trust de luces co obxectivo de optimizar o alumeado. Tamén está prevista a colocación dun proxector láser, que permitirá ampliar as posibilidades técnicas do espazo.
A Casa da Cultura de Camporrapado é un dos principais equipamentos culturais do municipio, polo que o goberno local subliña que estas melloras buscan reforzar o seu uso por parte das asociacións e colectivos veciñais, así como para a programación de actividades culturais e sociais.
