O Concello de Santiago presentou este martes o concurso internacional de ideas para a transformación do denominado conector central, un ámbito urbano de máis de 45.000 metros cadrados que se estende entre San Clemente e Santa Clara, atravesando o centro histórico e puntos clave como a Praza de Galicia ou a Porta do Camiño. O obxectivo é, segundo a alcaldesa Goretti Sanmartín, iniciar “un proceso que vai marcar o futuro histórico do desenvolvemento urbano de Compostela, mudando a relación do centro co resto dos barrios e mellorando a calidade de vida da veciñanza”.
Na presentación participaron tamén o concelleiro de Urbanismo, Iago Lestegás; o delegado en Santiago do Colexio Oficial de Arquitectos de Galicia (COAG), Ángel Cid, e o enxeñeiro de Camiños experto en mobilidade Fernando Nebot.
O concurso desenvolverase en dúas fases: na primeira, aberta ata o 7 de novembro, poderán concorrer todos os equipos que acrediten solvencia técnica e económica. Entre as propostas iniciais seleccionaranse cinco, que avanzarán a unha segunda fase na que deberán presentar un anteproxecto. O equipo gañador recibirá 50.000 euros, mentres que os catro restantes contarán con 30.000 euros cada un como accésits.
O concelleiro Lestegás explicou que a orientación básica é “acceder si, atravesar non”: será posible entrar en vehículo privado por necesidades concretas, mais non utilizalo como atallo entre o norte e o sur da cidade. O transporte público, vehículos de emerxencia, residentes, taxis ou mercadorías si poderán circular, mais a prioridade será a mobilidade peonil e a creación de novos espazos verdes, con sistemas permeables que melloren a resiliencia ante o cambio climático.
O representante do COAG, Ángel Cid, subliñou que o concurso debe ser entendido como “un proceso de reflexión colectiva” no que se implique tamén a cidadanía. Pola súa banda, o enxeñeiro Fernando Nebot destacou que o espazo público é “un dereito equiparable á sanidade ou á educación” e defendeu un cambio de paradigma urbano que sitúe ás persoas que camiñan no centro das prioridades.
A primeira execución concreta tras o concurso prevese nos tramos entre a Praza de Galicia e a Porta do Camiño, considerados estratéxicos para a reorganización da mobilidade en Compostela.
REUNIÓN SOBRE A TAXA TURÍSTICA
Paralelamente, o Concello informou de que onte tivo lugar unha reunión de traballo coa asociación Unión Hotelera para resolver dúbidas sobre a taxa turística, que entrará en vigor o 1 de outubro. Na xuntanza participaron a concelleira de Turismo Míriam Louzao, o edil de Facenda Manuel César, o tesoureiro municipal Carlos Moure e persoal técnico. O encontro, segundo fontes municipais, foi “cordial e produtivo” e dá continuidade ao proceso de diálogo mantido co sector durante os últimos meses.
