O Concello de Brión formalizou hoxe a súa adhesión ao sistema VioGén, impulsado polo Ministerio do Interior para o seguimento e protección das mulleres vítimas de violencia de xénero e dos seus fillos e fillas. O acordo foi asinado polo subdelegado do Goberno na Coruña, Julio Abalde, o alcalde, Pablo Lago Sanmartín, e o tenente coronel da Garda Civil, Jorge Bodelón, no marco dunha Xunta Local de Seguridade.
Abalde destacou que a incorporación dos concellos é clave porque “son precisamente eles quen están máis próximos á cidadanía e, polo tanto, as policías locais dispoñen dun maior coñecemento da realidade de cada municipio, o que supón unha mellora notable na protección das mulleres vítimas de violencia de xénero”. O alcalde, pola súa banda, subliñou que “avanzar cara unha protección máis rápida, integral e efectiva das mulleres maltratadas é moi positivo, como tamén o é que todas as administracións e forzas de seguridade esteamos coordinados”.
Durante a xuntanza tamén se presentaron os fondos do Pacto de Estado contra a Violencia de Xénero asignados para 2025. A provincia da Coruña recibirá un total de 783.522,87 euros, máis de 20.000 que o ano anterior. Brión contará con preto de 5.000 euros para reforzar as políticas locais nesta materia.
O subdelegado puxo en valor ademais a colaboración entre Garda Civil e Policía Local, que contribúe a manter unha taxa de criminalidade de 25 delitos por cada mil habitantes, dez puntos por debaixo da media provincial e galega. Lembrou tamén a importancia do Plan Director para a Convivencia e Mellora da Seguridade en Centros Educativos, que o pasado curso desenvolveu seis actividades nun centro de Brión con 150 participantes.
A Xunta Local de Seguridade aprobou igualmente o dispositivo para as festas de Santa Minia, que incluirá de novo un punto lila de atención a mulleres e persoas LGTBIQ+ vítimas de agresións, ademais de servir como espazo de sensibilización e prevención.
A visita a Brión foi a primeira de Julio Abalde como subdelegado do Goberno a un concello, encontro no que asinou no Libro de Honra municipal e mantivo unha reunión de presentación coa Corporación local.
