O 12 de outubro ás 19:30, a Sala Capitol de Santiago acollerá a presentación oficial do novo traballo discográfico de Cristian Silva, titulado Un home tranquilo. O músico, compositor e produtor de Carril chega á capital galega dentro da xira coa que está a dar a coñecer este álbum, que define como “a calma aparente que agocha un volcán interior”.
Un home tranquilo está concibido como unha viaxe sonora con protagonismo da gaita, instrumento central no discurso creativo de Silva. As pezas do disco integran estilos como o pop, o folk-rock, o funk-jazz e a música tradicional galega, nunha proposta que o artista describe como resultado dun proceso longo e esixente, tanto a nivel musical como persoal. O peche do álbum, Baño co leviatán, enlaza co seu anterior traballo Ego, simbolizando a transición entre a calma e a loita interior.
Sobre o escenario compostelán, Silva contará coa compañía da súa banda habitual: Suso Iglesias (acordeón), Efrén Nóvoa (baixo), Miguel Anxo López (batería), Xosé Piñeiro (guitarra), Ana Fernández (pandeireta e voz) e Iria Iglesias (teclados). O propio artista asumirá as gaitas, frautas, zanfona e voz. Ademais, está prevista a participación dalgúns dos colaboradores do disco, que se darán a coñecer nos vindeiros días.
O concerto promete unha posta en escena inmersiva, con guitarras, sintetizadores, gaitas e frautas procesadas, acompañadas dun coidado deseño visual que reforzará a intensidade da experiencia.
As entradas teñen un prezo de 15 euros e xa están dispoñibles en salacapitol.com.
