A SD Compostela acadou onte no Vero Boquete de San Lázaro un triunfo traballado por 2-1 fronte ao Cambados, nun encontro correspondente á terceira xornada da Tercera RFEF. O equipo compostelán suma así nove puntos de nove posibles no arranque de competición.
O partido comezou con forza para os locais, que se adiantaron no minuto 4 co primeiro gol de Carlos López coa camisola branquiazul, cun disparo potente dende a frontal da área. A vantaxe puido ampliarse pouco despois, cando Antón Guisande erró unha ocasión clara tras superar ao porteiro rival.
Na segunda metade, o Cambados reaccionou e logrou o empate no minuto 68, grazas a un disparo de Diego Iglesias que entrou pola escuadra. O gol visitante puxo en alerta ao cadro dirixido por Fabiano, que contou co apoio constante da bancada para buscar o desempate.
O desenlace chegou xa no desconto. Nunha acción a balón parado, produciuse a expulsión de Alberto Lago e a lesión de Aarón Martínez, que tivo que ser retirado en padiola pero consciente. Da falta resultante naceu o segundo gol: Armental centrou ao segundo pau e Pablo Crespo cabeceou á rede no minuto 90+3, desatando a celebración no estadio ante os 1.200 afeccionados presentes.
O próximo compromiso do Compostela será nunha visita ao Céltiga na Illa de Arousa, coa intención de prolongar a súa serie de vitorias neste inicio ligueiro.
