A alcaldesa de Santiago, Goretti Sanmartín, participou este venres no minuto de silencio convocado diante de Raxoi en solidariedade co pobo palestino. Na súa intervención posterior, reclamou “un alto o fogo inmediato”, a apertura de corredores humanitarios e a fin “dun xenocidio que está a sufrir a poboación de Gaza”.
Sanmartín advertiu que a situación non se limita á destrución provocada polos bombardeos, senón tamén á falta de recursos básicos: “Hai xente que está a morrer polas bombas, pero tamén pola situación humanitaria, sanitaria e pola ausencia de alimentación”, subliñou.
A rexedora compostelá agradeceu a presenza de representantes da universidade, da Deputación da Coruña, de persoal do propio concello e do conxunto da corporación municipal, e destacou que en Santiago “todos os grupos políticos coincidiron na condena ao que está a acontecer en Palestina”.
Segundo afirmou, a comunidade internacional mantén unha actitude de “complicidade” ao non actuar con firmeza. “Non podemos ficar indiferentes, sairemos á rúa tantas veces como faga falta para reclamar un alto ao fogo”, expresou, lembrando que a situación actual “mesmo cuestiona a propia esencia da humanidade”.
Sanmartín insistiu na necesidade dunha resposta global “moito máis contundente” por parte dos estados. “Se non hai unha reacción clara e forte, non haberá outra maneira de parar esta masacre”, concluiu.
DENUNCIAS DE COMPOSTELA X PALESTINA
Diversos colectivos sociais advertiron que, nos últimos 22 meses, España pechou máis de 40 contratos de compra de armamento a empresas israelís por máis de 1.041 millóns de euros, converténdose no maior importador da UE.
As organizacións convocadas por Compostela x Palestina critican a demora do Goberno central en aplicar un embargo de armas aprobado polo Congreso en maio e reclaman que se transformen en feitos as declaracións de apoio ao pobo palestino.
Entre as súas demandas, solicitan que se garanta a chegada da Flotilla Global Summud, que partiu de Barcelona con axuda humanitaria, e que se rompan relacións diplomáticas e comerciais con Israel, incluído un embargo total de armas e tecnoloxía militar.
Os colectivos tamén instan a impedir o tránsito de material bélico por territorio español, a modificar o convenio militar con Estados Unidos e a apoiar sancións internacionais contra Israel.
