A Coordinadora das Asociacións Veciñais de Santiago celebrou onte mércores unha reunión na Casa das Asociacións de Cornes, con participación de 15 colectivos e un representante da Federación de Asociacións Veciñais do Rural (FERUSA). No encontro decidiuse formalizar a Coordinadora, que quedará composta de maneira provisional polos representantes veciñais no Consello de Relacións Veciñais, e convocar reunións trimestrais ordinarias.
Entre as funcións acordadas está a elaboración de alegacións tipo para que cada entidade poida adaptalas ás súas necesidades e presentalas no Concello, así como unha proposta de actualización do Regulamento de Participación Cidadá, vixente dende 1998.
En relación coa nova taxa do lixo, as asociacións mostraron unanimidade en defender o criterio de “pago por xeración”, fronte á vinculación co valor catastral das vivendas, ao entender que este non ten relación co volume de residuos xerados. Reclaman ademais coñecer o estudo económico do servizo, incorporar as terrazas como superficie computable nos locais de hostalaría e equiparar bares e restaurantes, así como estudar modelos doutros concellos como Oviedo, onde a taxa varía en función da frecuencia de recollida. Prepararase unha alegación tipo que se remitirá a todas as entidades.
Tamén se puxo sobre a mesa a necesidade de melloras no transporte urbano, con máis frecuencias, marquesiñas e paneis de información, mellor comunicación dos cambios de horarios, renovación da flota e adaptación do tamaño dos vehículos ás rúas.
Por último, as entidades veciñais fixeron público o seu apoio á Asociación Río Sarela-San Lourenzo diante da posible reapertura da antiga sala Malatesta como local de ocio nocturno. No escrito asinado, consideran que esta actividade, cualificada pola xurisprudencia como “molesta” e “insalubre”, é incompatible co uso residencial e vulnera dereitos fundamentais como o descanso nocturno e a inviolabilidade do domicilio. As asociacións instan ao Concello a recoller esta incompatibilidade na normativa urbanística, tanto no PXOM como no PE-1.
