A investigadora do CRETUS da Universidade de Santiago de Compostela (USC), Cristina Galego Rodríguez, realizou unha tese na que aborda a fabricación de films biodegradables a partir de pel de atún.
Tal e como trasladou a USC nunha nota de prensa, o principal obxectivo da tese foi “optimizar o proceso de extracción de gelatina a partir da pel deste peixe para maximizar o rendemento e as propiedades do produto final”.
Para iso, utilizáronse disolventes eutécticos “seguros e sustentables” con exploración de variables como o tempo, a temperatura e a proporción de disolvente para definir as condicións óptimas do proceso.
Neste contexto, os resultados demostraron a posibilidade de obter gelatina apta para a elaboración de films biodegradables, cun “importante potencial” de aplicación en sectores como o da industria alimentaria.
Así, a tese “amplía as alternativas para o aproveitamento sustentable dos recursos mariños” e pon de manifesto “a viabilidade dunha tecnoloxía accesible e adaptable a distintas escalas de produción”.
