O grupo municipal socialista de Santiago de Compostela manifestou o seu rexeitamento ao anuncio da alcaldesa, Goretti Sanmartín, de crear un posto específico de protocolo no Concello. A concelleira socialista Marta Abalcualificou a decisión como “cando menos un exercicio de manipulación política” e acusou á rexedora de que “minte descaradamente”.
Segundo explicou Abal, a praza de protocolo xa figuraba na oferta de emprego público de 2024, mais o proceso de cobertura interina permanece paralizado dende xullo de 2024, momento no que se fixo público o listado provisional de persoas admitidas e excluídas. A edil considerou que o executivo local “non está conforme co listado publicado” e opta por “colocar a dedo a unha persoa da súa confianza baixo a fórmula do persoal eventual”.
Para a socialista, este movemento constitúe “un parche que demostra que a prioridade non é respectar os procesos abertos nin garantir a igualdade de oportunidades, senón asegurar que o posto clave de protocolo quede baixo o control do partido”.
Dende o PSdeG aseguran que “Sanmartín non anuncia nada novo, senón que tapa cun relato interesado unha realidade incómoda”. Abal insistiu en que “as declaracións da alcaldesa erosionan a confianza na xestión municipal e proxectan a imaxe dun Concello convertido nun espazo de recolocación partidaria en lugar dunha institución ao servizo de toda a veciñanza”.
