A Xunta de Goberno Local do Concello de Ames aprobou o expediente de licitación das obras de mellora da rúa Agro da Vella, situada no núcleo urbano do Milladoiro. O investimento previsto ascende a 326.160,41 euros, financiados a través do POS+ 2025 da Deputación da Coruña.
O proxecto abrangue unha reordenación do tráfico rodado e a renovación integral da pavimentación. A vía pasará a ter sentido único de circulación cara á avenida do Muíño Vello, contará con aparcamento en liña na marxe esquerda e aparcamento en batería oblicuo na dereita, mentres que as beirarrúas ampliaranse ata os 2,5 metros en ambas marxes.
Tamén se actuará sobre unha zona verde situada na parte traseira da Escola de Educación Infantil do Milladoiro, que se adaptará para uso veciñal como espazo de ocio. O concelleiro de Obras e Servizos Básicos, Gustavo Nieto, lembrou que “este proxecto forma parte do POS+ 2025 aprobado no pasado mes de febreiro”, no que se inclúe un total de seis actuacións cun investimento global superior ao millón de euros.
Entre as actuacións previstas, destacan a colocación de novo pavimento de formigón vibrado nas beirarrúas, a renovación da capa de rodaxe da calzada con mestura bituminosa en quente, a instalación de pavimento táctil nos pasos de peóns para garantir a accesibilidade e a mellora do sistema de drenaxe.
O espazo de lecer proxéctase cunha explanada pavimentada, un sendeiro e mobiliario urbano, como bancos de formigón con madeira e xardineiras, ademais de novas plantacións de árbores.
A intervención inclúe tamén a renovación da iluminación pública, coa instalación de 27 columnas de aceiro de 5 metros, 35 luminarias, 7 balizas led e novas arquetas. A actuación completarase coa sinalización horizontal e vertical e a adaptación dos pasos de peóns existentes.
Segundo o executivo local, esta remodelación pretende mellorar a mobilidade peonil, ordenar o aparcamento e dotar ao Milladoiro dun novo espazo verde de convivencia veciñal
