A Concellaría de Capital Cultural, dirixida por Míriam Louzao, aprobou a concesión de preto de 266.000 euros en subvencións para actividades culturais de entidades profesionais e asociacións compostelás.
Segundo informou o Concello, a Xunta de Goberno Local deu luz verde este luns á repartición de fondos que benefician a once entidades profesionais cun total de 250.000 euros e a catro asociacións, que recibirán en conxunto 15.830,67 euros.
Entre as axudas concedidas ás entidades profesionais destacan as partidas de 45.000 euros para Work On Sunday, Nordesía Produccións e Music Arte Rey Saavedra. Outros beneficiarios son Títeres Cachirulo (30.000), Correveydile (15.000), Magia en la Manga (15.000), Casta Diva (15.000), Fausto Deseño Asociados (15.000), Ilusiones Mágicas (12.160), Fundación SGAE (6.877,85) e Noente Paradise (5.962,15).
No apartado asociativo, recibirán apoio a Asociación medioambiental e cultural ‘A pedra que fala’ (1.179,09), a Asociación Cultural Barriga Verde (5.000), a Asociación Cultural Musical de Antiguos Tunos Compostelanos (4.869,58) e a Nova Escola Galega (5.000).
As subvencións cobren ata un 80% do orzamento das actividades. O importe máximo establécese en 5.000 euros para asociacións e en 45.000 para festivais profesionais, mentres que outras actividades profesionais poden recibir ata 15.000 euros.
Louzao salientou que estas axudas buscan “dinamizar a vida cultural no concello e apoiar a diversidade de proxectos”, garantindo unha programación variada que abranga música, teatro, exposicións, cine, fotografía, conferencias, performances e outras propostas abertas ao público.
Entre as novidades da convocatoria figura un procedemento máis sinxelo: só será necesario xustificar os gastos subvencionables, elimínase a categoría independente de persoal, os custos indirectos aumentan do 10 ao 15% e actualízanse os límites de aloxamento, manutención e desprazamento. Ademais, os baremos foron revisados para maior claridade e establécense consecuencias en caso de incumprimento.
As actividades apoiadas deberán realizarse entre o 1 de xaneiro e o 20 de outubro de 2025, e a súa xustificación terá que presentarse antes do 25 de outubro de 2025.
