O Monbus Obradoiro xa ten definida a súa plantilla para a tempada 2025-2026 tras anunciar a incorporación do xogador sueco Denzel Andersson, ala-pivote de 28 anos e 2,04 metros de altura. O novo reforzo únese ao conxunto compostelán para fortalecer o xogo interior e sumará aos adestramentos unha vez complete a súa participación coa selección de Suecia na preparación do EuroBasket.
Na última campaña, Andersson militou no Dziki Warszawa da primeira división polaca, onde asinou unha media de 7,5 puntos, 4,9 rebotes e 1,5 asistencias por encontro. O xogador conta ademais con experiencia previa na liga ACB, tras dúas tempadas no Surne Bilbao Basket (2022-2024). Os seus inicios como profesional estiveron vinculados ao BC Luleå da liga sueca e ao Stal Ostrów Wielkopolski polaco.
O adestrador do Obradoiro, Diego Epifanio, subliñou que Andersson achegará “experiencia, xa que xogou en competición europea e a nivel internacional coa súa selección”. O técnico definiuno como “un catro que, en ataque, destaca pola boa lectura do xogo sen balón, a súa capacidade de xerar vantaxes e polo rebote ofensivo”, engadindo que en defensa “aporta predisposición, condicións físicas e tiro exterior”.
O club expresou o seu desexo de que o xogador se adapte con rapidez tanto ao equipo como á cidade de Santiago de Compostela, co obxectivo de que poida ofrecer a súa mellor versión desde o inicio da tempada.
