O Concello de Boqueixón vén de licitar dúas actuacións que permitirán a mellora de máis de vinte pistas e estradas municipais, cun investimento total que supera os 140.000 euros. Os traballos darán comezo nas próximas semanas e abranguen actuacións en oito parroquias do municipio.
O primeiro proxecto contempla intervencións en accesos a núcleos de Deseiro de Arriba (Sergude), Vigo e Alboia (Lamas), Gastrar (Gastrar), Camporrapado, Rebordao e Mato (Oural), Vilar (Ledesma), A Quenlla (Sucira), Pedrouzo (Pousada) e Piñeiro de Abaixo (Boqueixón). As obras consistirán en tratamentos asfálticos superficiais con rego de selado, reparación previa de fochancas e limpeza de cunetas.
Tamén se executará a sinalización horizontal do viario do Forte a Casalpegito, de 3.390 metros, co pintado de liñas de bordo. Inclúese a construción dun muro de sostemento de terras, a pavimentación en aglomerado en quente dun tramo e a execución dunha arqueta de formigón. Neste proxecto recóllense ademais melloras en pequenos camiños de Pumares (Sergude), Pazos (Lestedo), Castrelo-Virxe de Lurdes (tres tramos), Burgo (Lamas) e Ledesma, que suman máis dun quilómetro.
O segundo proxecto aprobado permitirá actuar nos accesos a Manlle (Lamas), Eirexe (Pousada), Santaia e Casalvieito (Codeso), con reparación de baches, reforzo da capa de rodaxe e limpeza de cunetas para mellorar a drenaxe.
Ademais, prevese a mellora dun camiño en Burgo (Lamas) de 140 metros de longo por 3,5 de ancho, onde se executará un acondicionamento previo con saneos e pedraplén, aplicando posteriormente zahorra. Así mesmo, asfaltaranse 395 metros de viario en Baiuca (Ledesma) cun ancho de 5,5 metros.
