O Concello de Ames detectou esta semana un vertedoiro ilegal de lixo nunha pista forestal situada nos Batáns, preto do cemiterio municipal. Grazas ao aviso dun veciño e á investigación da Policía Local, localizouse á persoa responsable, que contratara unha empresa para limpar o interior dunha vivenda. Os restos —madeira, plásticos, caixas e mobles— acabaron depositados de forma irregular no monte.
Segundo informou o Concello, a empresa infractora e o particular implicado deberán recoller o lixo e trasladalo a un punto autorizado, ademais de enfrontarse a posibles sancións económicas que, en función da gravidade, poden variar entre 900 e 9.000 euros.
O concelleiro de Obras e Servizos Básicos, Gustavo Nieto, destacou que “cando se realizan obras é importante facer un control da xestión dos residuos, para saber que acaban no lugar correcto e non nunha pista forestal”. Tamén subliñou a necesidade de extremar o coidado coa documentación que se tira, como albaráns ou recibos, ao tratarse de datos persoais sensibles.
Desde o goberno local apélase á colaboración cidadá para denunciar situacións semellantes. A veciñanza pode dar aviso chamando ao número 619 76 75 75 se observa que se está a tirar lixo no monte.
O Concello lembra que os residentes dispoñen do servizo de recollida de voluminosos, operativo nos teléfonos 981 19 12 40 e 639 10 76 38, e do Punto Limpo do Milladoiro, aberto de luns a sábado en horario de 9:00 a 15:00 e de 16:00 a 20:00, ao que se poden levar mobles, electrodomésticos e outros materiais que non van nos colectores habituais. Para máis información está dispoñible o teléfono 981 53 66 88.
