O Concello de Ames realizou un chamamento á colaboración e solidariedade da veciñanza para apoiar ás zonas afectadas polos incendios forestais a través dunha campaña de recollida de material promovida por polo 112 coa colaboración da Agrupación de Voluntarios de Protección Civil de Ames. Os materiais precisos son batelumes, lentes de protección, luvas e máscaras.
Puntos e horarios de entrega. O material poderá entregarse na Casa do Concello en horario de mañá, de 09:00 a 14:00, e nas cafetarías das Casas da Cultura de Bertamiráns e do Milladoiro en horario de tarde, de 16:00 a 21:00. Segundo anunciou o Concello, o recollido enviaranse aos lugares onde máis falta faga.
VÍAS OFICIAIS PARA AXUDAR
O Centro Integrado de Atención ás Emerxencias recomenda non acudir de xeito individual ás zonas queimadas. Para que a axuda sexa efectiva, debe canalizarse a través das Agrupacións de Protección Civil dos concellos, evitando interferencias no operativo e risco para as persoas voluntarias.
O presidente da Agrupación amesá, Antonio Martínez, indicou que o persoal está listo para ser mobilizado cando así se lles requira: “estamos preparados para ser mobilizados en canto sexa necesaria a nosa axuda. Se nos piden colaboración estamos preparados para acudir ás zonas afectadas polos incendios forestais”.
INFORMACIÓN E CONTACTO
Para resolver dúbidas sobre como participar nesta campaña, están dispoñibles o teléfono 673 17 88 88 e o correo electrónico avpcames@gmail.com da Agrupación de Voluntarios de Protección Civil de Ames.
