O local social de Lestedo acolleu a primeira das reunións abertas sobre a proposta de declarar o Pico Sacro como Ben de Interese Cultural (BIC) na categoría de Conxunto Simbólico. A iniciativa, impulsada pola Dirección Xeral de Patrimonio en colaboración co Concello de Boqueixón, busca elaborar un plan de protección con participación de asociacións, colectivos e persoas interesadas. Segundo se anunciou, está previsto convocar unha segunda xuntanza a finais de setembro.
O encontro estivo presidido polo alcalde de Boqueixón, Ovidio Rodeiro, e contou coa intervención de diferentes profesionais vencellados ao estudo do monte. Entre eles, a investigadora do CSIC-Incipi, Cristina Sánchez Carretero, coordinadora do informe técnico; a facilitadora de procesos comunitarios Adela Vázquez Veiga; o técnico de imaxe e son Rubén Vuelta; e o escritor e xornalista Henrique Neira, encargado de abordar a dimensión histórica e simbólica do Pico Sacro.
O proxecto conta co respaldo institucional da Xunta de Galicia, coa que o rexedor mantivo recentemente unha reunión para avanzar nos trámites. Rodeiro subliñou que “o Pico Sacro é un dos referentes culturais e turísticos xa non de Boqueixón senón de Galicia” e lembrou a súa presenza no Códice Calixtino como parte da orixe de Compostela.
O alcalde destacou tamén as diferentes razóns polas que se promove esta declaración: a súa relación coa cultura xacobea e a relixión, a pegada na literatura galega, o interese arqueolóxico, os valores vinculados á espeleoloxía e a súa singularidade xeolóxica, ao tratarse dunha montaña de cuarzo situada nun territorio granítico.
Co inicio deste proceso, o Concello e a Dirección Xeral de Patrimonio pretenden recoñecer e protexer un espazo que, segundo os responsables do proxecto, constitúe un símbolo central da identidade cultural galega.
