O Monbus Obradoiro xa ten marcada a data de inicio da súa pretempada: será o luns 18 de agosto, cando os xogadores comezarán os adestramentos baixo as ordes do novo adestrador, Jordi Fernández ‘Epi’, coa mente posta no debut na Primeira FEB, despois do descenso da pasada tempada.
Os integrantes do cadro comezarán a chegar a Santiago de Compostela ao longo da vindeira semana, coas primeiras probas médicas previstas entre o xoves 14 e o propio luns 18, día no que tamén se estreará o traballo na pista.
O calendario de amigables vai collendo forma e inclúe varios encontros salientables. O primeiro será o venres 29 de agosto ás 20:30 contra o Leyma Coruña, no Torneo San Roque que se celebrará en Vilagarcía de Arousa. O luns 1 de setembro, o equipo volverá medirse ao FC Porto, nun clásico da preparación obradoirista. Este encontro, aínda por confirmar se se celebrará a porta aberta, podería funcionar máis como un adestramento con pausas técnicas que como un partido convencional.
A seguinte fin de semana, o venres 5 e sábado 6, disputarase na cidade da Coruña unha nova edición da Copa Galicia, aínda pendente de confirmar os emparellamentos das semifinais.
Xa no treito final da preparación, o Obradoiro viaxará o sábado 13 de setembro a Oviedo para enfrontarse ao equipo local e, apenas tres días despois, o martes 16, xogará en Ponferrada fronte ao Zamora.
Como acto final antes do inicio da competición oficial, o club ten previsto organizar un partido de presentación en Santiago, aínda sen rival nin data concreta, pero que se espera para a fin de semana do 19 de setembro.
Ademais, o día 9 de setembro está programado un adestramento a portas abertas, que servirá de reencontro co público compostelán. O club advertiu que a data podería variar, polo que informará a través dos seus canais oficiais cando se achegue o momento.
