O barrio compostelán de Pontepedriña está a ser escenario das primeiras actuacións do proxecto ‘Entre Sar e Sarela’, unha iniciativa que busca transformar a zona nun espazo máis verde, resiliente e adaptado ao cambio climático. Neste contexto, o Concello de Santiago, co asesoramento do Instituto de Biodiversidade Agraria e Desenvolvemento Rural (IBADER) da Universidade de Santiago e co apoio da Fundación Biodiversidade, iniciou a retirada de especies exóticas e invasoras para substituílas por flora autóctona adaptada ao clima galego.
As tarefas de eliminación céntranse nas rúas do Escultor Camilo Otero e Amor Ruibal, onde tamén se están a renovar pavimentos e implementar sistemas drenantes. Entre as especies que se están retirando destacan a ‘Robinia pseudoacacia’ (falsa acacia), o ‘Eucalyptus globulus’ (eucalipto común) e o ‘Agapanthus africanus’, unha planta ornamental que pode comportarse como invasora na ausencia de controis naturais. Este último caso será tratado de forma específica: as plantas retiradas das proximidades do río Sar serán reutilizadas en zonas pechadas fisicamente, como rotondas, segundo informou o departamento de Parques e Xardíns.
Nunha das zonas máis visibles da actuación, o noiro situado xunto ao IES de Pontepedriña, estanse a eliminar 23 exemplares de especies invasoras e 16 de exóticas non invasoras, sobre unha superficie de 600 metros cadrados. En substitución, a proposta paisaxística prevé a plantación de carballos, érbedos, acivros e especies de ribeira, así como outros arbustos autóctonos, co obxectivo de aumentar a biodiversidade e a estabilidade ecolóxica do terreo. Estas novas plantacións levaranse a cabo durante o período de parada vexetativa, a comezos do inverno.
A intervención responde aos principios da restauración ecolóxica recollidos nas estratexias europeas, estatais e galegas de infraestrutura verde, que orientan o conxunto dos cinco proxectos piloto que forman parte da estratexia local para facer fronte á crise climática.
O proxecto ‘Entre Sar e Sarela’, que conta cun financiamento do 95 % procedente dos fondos Next Generation da UE, está promovido polo Concello en colaboración coa Universidade de Santiago e o Ministerio para a Transición Ecolóxica e o Reto Demográfico (MITECO). A súa finalidade é crear corredores ecolóxicos urbanos, renaturalizar espazos públicos degradados e reducir o impacto do tráfico rodado en áreas como a de Pontepedriña, onde a proporción de superficie pública destinada ao coche é moi elevada.
