A alcaldesa de Santiago, Goretti Sanmartín, participou hoxe no acto de celebración da concesión da acreditación de excelencia María de Maeztu ao Centro Singular de Investigación en Medicina Molecular e Enfermidades Crónicas (CiMUS) da Universidade de Santiago de Compostela (USC), e aproveitou a ocasión para reivindicar o papel central da ciencia e da investigación no modelo de cidade que defende o actual goberno municipal.
Durante a súa intervención, Sanmartín recoñeceu o valor simbólico e estratéxico do selo concedido pola Axencia Estatal de Investigación, pero quixo destacar tamén o compoñente humano e colectivo que o fai posible. “Non hai cuestións individuais: vimos do que investigaron, do que traballaron as persoas que viñeron antes, e traballamos para conformar grupos que nos proxecten cara ao futuro”, sinalou. A rexedora compostelá insistiu en que este recoñecemento debe entenderse como un “punto seguido”, que visibiliza un traballo constante, habitualmente “na sombra”, e que agora sae á luz.
A alcaldesa recoñeceu que distincións como a María de Maeztu non só miden resultados, senón tamén visión, estratexia e capacidade de planificación a longo prazo. Para ela, o CiMUS representa “proxectos de esperanza” e avances fundamentais en campos como a xenómica ou a loita contra o cancro, cun impacto que transcende a universidade e alcanza “a poboación mundial, e de maneira moi particular, ao Concello de Santiago”.
Sanmartín puxo tamén en valor o feito de que Compostela sexa un polo de atracción científica, non só por motivos patrimoniais ou turísticos, senón pola súa capacidade para acoller talento investigador. Neste sentido, celebrou que o CiMUS sexa un dos espazos que “fan da nosa cidade un lugar onde a innovación de máximo nivel é posible”, e instou a seguir traballando para que Santiago acolla congresos, xornadas e encontros científicos que alimenten este tecido vivo.
A alcaldesa lembrou que o Concello de Santiago recoñeceu o pasado ano a directora científica do CiMUS, Mabel Loza, cunha das Albas de Compostela, tanto pola súa traxectoria en farmacoloxía como por representar un compromiso coa ciencia que forma parte da identidade da cidade: “Santiago sería outra sen ela, sen a universidade, sen un mundo investigador”.
Pecharía a súa intervención facendo referencia ás novas xeracións, aos estudantes e investigadoras que chegan a Compostela con incerteza pero coa esperanza de atopar “o seu lugar no mundo”. Un sentimento, dixo, que resume a forza transformadora do Campus Vida, ao que desexou “outros catorce anos máis de vidas que latexan”.
