A organización sindical CIG-Ensino convocou unha concentración de protesta diante da sede de Muface en Santiago de Compostela para mañá ás 11:30, co obxectivo de rexeitar o peche definitivo desta oficina, previsto para o luns 4 de agosto. A mobilización terá lugar na Avenida Rosalía de Castro, 23, diante das instalacións da mutualidade, que deixarán de prestar atención presencial ás persoas mutualistas da cidade e comarca.
A convocatoria prodúcese despois de que a directora xeral de Muface anunciase esta decisión na última reunión do Consello Xeral da mutualidade, na que está presente a CIG-Ensino. Segundo se informou nesa xuntanza, o peche responde á “falta de persoal”, mais dende a central sindical consideran que se trata dun novo recorte nos servizos públicos que afecta directamente ao funcionariado e, de forma especial, ao persoal docente.
A protesta do martes busca visibilizar o impacto negativo desta medida, que obriga ás persoas mutualistas da área de Santiago a desprazarse á Coruña para realizar trámites que ata agora podían facer na cidade. Estes trámites inclúen xestións sanitarias, prestacións por incapacidade temporal, tarxeta sanitaria europea ou axudas sociosanitarias.
A CIG-Ensino chama á participación do conxunto do funcionariado e da comunidade educativa, lembrando que en Galicia 91.648 persoas pertencen a Muface, das cales 27.589 son docentes en activo, moitos deles con destino na comarca compostelá. A condición de mutualista é obrigatoria para parte do persoal de nova incorporación, mesmo cando optan pola sanidade pública a través do Sergas.
