A piscina municipal do Milladoiro, no concello de Ames, segue pechada tras a incidencia detectada o pasado martes 15 de xullo, cando se produciu un desprendemento do liner que reviste o interior da infraestrutura. O Concello informa que os traballos de reparación continúan en marcha e que a complexidade dos danos é maior do previsto inicialmente, o que provocou o retraso na reapertura, prevista nun primeiro momento para este luns 21 de xullo.
Aínda que as obras seguen en execución, o goberno local anuncia que se irán habilitando zonas da piscina de maneira progresiva. Así, está previsto que entre este martes 22 e mércores 23 de xullo se reabra ao público a piscina pequena e a área de lecer, mentres se rematan os traballos na piscina principal.
Segundo fontes municipais, a reparación non implicará custos adicionais para as arcas públicas, xa que a obra afectada aínda se atopa en período de garantía. O obxectivo, sinalan, é garantir que a instalación reabra nas mellores condicións de seguridade e funcionalidade para as persoas usuarias.
Ao tempo que se traballa na reparación da infraestrutura actual, o Concello de Ames xa puxo en marcha os trámites para a redacción dun proxecto de ampliación da piscina municipal, co propósito de adaptala ao crecemento demográfico do Milladoiro e ás novas necesidades de servizo da veciñanza. Esta ampliación busca dar resposta á elevada demanda desta instalación durante os meses de verán, e ofrecer un equipamento deportivo e recreativo axeitado para os próximos anos.
