A proposta xorde como resposta á preocupación compartida polo retroceso no uso do galego, especialmente logo das mobilizacións masivas de novembro, febreiro e maio de 2024, nas que milleiros de persoas reclamaron nas rúas o cumprimento dos compromisos recollidos en acordos como a Declaración Universal dos Dereitos Lingüísticos (1996), a Carta Europea das Linguas Rexionais ou Minorizadas (2001) ou o Plan Xeral de Normalización da Lingua Galega (2004). As entidades promotoras alertan de que parte das medidas propostas nestes documentos non foron aplicadas e mesmo se lexislou en contra dalgunhas delas, agravando a perda de falantes e a dificultade social para manter a transmisión interxeracional da lingua.
Co obxectivo de reverter esta situación, as organizacións integradas en ‘Lingua Vital’ comezarán no último trimestre de 2025 un traballo sectorial para avaliar o grao de cumprimento das medidas previstas no PXNLG, identificar os obstáculos que impiden a súa posta en práctica e propoñer accións normativas e executivas concretas. Ademais, cada entidade comprometerase a implementar no seu ámbito aquelas accións que contribúan de xeito efectivo á normalización lingüística, ao tempo que se procurará un compromiso explícito por parte das institucións públicas para facer efectivos os dereitos lingüísticos da cidadanía.
A coordinación do proceso será participativa, mediante grupos de traballo abertos, e con contacto directo co tecido social galego, convidando a outras entidades e persoas a sumarse. Para obter máis información ou adherirse á iniciativa, está habilitado o correo queremosgalego@queremosgalego.gal.
