O Festival Internacional Atlántica continúa este martes 1 de xullo en Santiago de Compostela cunha xornada marcada pola memoria compartida, a participación cidadá e a reivindicación colectiva a través da palabra. O programa do día combina unha lectura pública coral arredor da figura de Alfonso Daniel Rodríguez Castelao e un concerto nocturno protagonizado por Bouba Pandeireteiras, co pano de fondo da defensa do territorio, da identidade e da creación popular.
A mañá comezará ás 11:30 no Panteón de Galegas e Galegos Ilustres, coa inauguración da actividade ‘Como dicía Castelao’, un maratón de lectura aberta ao público que se prolongará ata as 20:30. A presidenta do Consello da Cultura Galega, Rosario Álvarez, será a encargada de abrir o acto xunto á deputada de Cultura da Deputación da Coruña, Natividad González, o secretario xeral de Política Lingüística, Valentín García, a alcaldesa de Santiago, Goretti Sanmartín, e o arcebispo da Diocese, Francisco José Prieto.
Durante a lectura, máis de medio cento de entidades culturais e representantes institucionais darán voz aos textos de Castelao, entre eles membros da Fundación Castelao, o Museo do Pobo Galego, a USC, o Museo de Pontevedra, a Real Academia Galega, a Academia Galega de Teatro, a Real Academia de Belas Artes, e tamén representantes da Alcaldía de Rianxo e dos consulados de Arxentina e Uruguai, países fundamentais na traxectoria vital do rianxeiro.
A xornada contará tamén coa participación de figuras recoñecidas da escena galega como Faia Díaz, Avelino González, Mónica Caamaño, Soledad Felloza, Evaristo Calvo, Víctor Mosqueira ou Vero Rilo, entre outros nomes que interpretarán en voz alta fragmentos emblemáticos da obra castelaoiana. A organización tamén habilitou unha rede de “garda-escoita”, persoas voluntarias que garantirán unha escoita continuada e activa ao longo de toda a sesión, que se poderá seguir libremente sen inscrición previa.
Pola noite, os xardíns do CSC Maruxa e Coralia acollerán ás 21:00 horas o concerto Termando dos marcos, o novo proxecto de Bouba Pandeireteiras, formación que redefine a música tradicional dende unha perspectiva feminista e comunitaria. Con retranca e contundencia escénica, esta proposta nace “a lume lento” e dende a aldea, segundo sinalan as propias integrantes, para reivindicar as marxes como espazo de dignidade, palabra e futuro. “Os marcos somos nós”, proclaman, nun espectáculo que conxuga pandeiretas, voces e testemuños como acto de resistencia.
Nado en 2013, o Festival Atlántica mantén a súa aposta por unha narración oral contemporánea que bebe das raíces atlánticas e da oralidade popular, tendendo pontes entre culturas e xeracións. Dende Santiago, a súa sede orixinaria, estende cada verán unha rede de encontros onde a palabra falada se transforma en arte viva, comprometida e comunitaria. A programación continúa nos vindeiros días por distintos espazos da cidade e da xeografía galega, cun marcado acento na diversidade, a igualdade e a sostibilidade.
