O Milladoiro volverá converterse nun epicentro do rock galego o 1 de agosto coa celebración da décimo cuarta edición do Millarock, unha cita xa consolidada no calendario cultural de Ames. O festival, promovido polo Concello de Ames a través da súa área de Cultura e co apoio da Rede Cultural da Deputación da Coruña, manterá a súa aposta por visibilizar bandas emerxentes, impulsar a escena local e potenciar o rock feito en galego.
Nesta nova edición, o Millarock acada tamén un novo nivel de compromiso social, incorporando medidas dirixidas a garantir a accesibilidade e a inclusión de persoas con discapacidade. Mochilas vibratorias, xa estreadas con éxito nas Prebadaladas 2024, permitirán ás persoas con discapacidade auditiva experimentar a música mediante a vibración. Así mesmo, habilitarase unha plataforma elevada con rampla para persoas con mobilidade reducida, favorecendo a igualdade de acceso aos concertos.
No acto de presentación, celebrado este mércores no Milladoiro, o alcalde e concelleiro de Cultura, Blas García, destacou que “o ano pasado dimos un paso adiante con implicar aos máis pequenos dentro do mundo do rock e este ano apostamos por facer un Millarock máis inclusivo e apto para todos”. Pola súa banda, María Vázquez, técnica do departamento de Cultura, incidiu en que “o Millarock mantén a súa esencia de rock en galego, grupos con vinculación en Ames ou da contorna, con compoñentes femininas e tamén apoio a grupos emerxentes”.
A programación arrancará ás 19:00 horas no Anfiteatro coa proposta ‘Merenda Rock’, a cargo da escola de música ‘A Casa do Rock’. Trátase dunha actividade pensada para o público infantil e familiar, con obradoiros participativos de guitarra, percusión ou teclado, que buscan achegar o rock á infancia dun xeito lúdico e pedagóxico.
A parte máis potente do festival comezará ás 22:00 horas na Travesía do Porto, coas actuacións de tres bandas que representan diferentes momentos e estilos do rock galego actual:
-
Ulex, banda compostelá formada en 2022, abrirá a noite coas cancións do seu primeiro disco Lonxe de ti. O grupo está integrado por Xian Castro, Mónica Fuentes, Tomás Sánchez e Martiño Quintela.
-
Battosai, trío de rock alternativo con fortes raíces en Ames e creado en 2018, ofrecerá unha selección do seu recente álbum Lágrimas y Milagros, influenciado polo punk e o grunge dos anos 90 e 2000.
-
Ruxe Ruxe, formación histórica do rock galego con case trinta anos de traxectoria, pechará a noite presentando o seu último disco Xabral, producido por Kaki Arkarazo e con nova xira baixo o nome ‘Pub Rock’.
