O Partido Popular de Santiago censura a xestión do BNG nas festas locais e promete recuperar o seu prestixio se chega ao goberno en 2027.
Nunha comparecencia ante os medios, os concelleiros populares Nerea Barcia e Adrián Villa criticaron duramente a programación das festas da cidade baixo o actual executivo, ao que acusan de ter levado a Santiago a perder o seu papel como referente cultural e festivo tanto en Galicia como no noroeste peninsular.
Segundo Adrián Villa, “as festas de Santiago xa non atraen visitantes coma antes”, e sinalou que a cidade “tivo as peores festas de toda Galicia”. Afirmou que hai unha tendencia descendente desde 2015, e acusou ao BNG de falta de planificación, variedade e cobertura horaria. “Antes viña xente de toda Galicia só polas festas; agora Santiago xa non é referencia”, asegurou.
O edil lamentou a ausencia de elementos tradicionais como os cabezudos, a menor presenza de agrupacións folclóricas, e a falta de artistas de renome nas actuacións. Tamén puxo en valor o traballo das comisións de festas dos barrios, que, con recursos limitados, seguen mobilizando á veciñanza con actividades propias.
Pola súa banda, Nerea Barcia reforzou as críticas insistindo na “falta de ambición” do programa actual, tanto nas actividades principais como nas paralelas. “Houbo concertos que remataron ás 22:30 ou 23:00, mesmo en véspera de festivo”, sinalou, referíndose ao espectáculo organizado por Los 40 Principales na Praza da Quintana. A súa intervención insistiu na descentralización da programación e na falla de contidos nocturnos, especialmente no casco histórico, que ao seu xuízo debería ser epicentro das celebracións.
Os populares denunciaron tamén a falla de atraccións na Alameda e relacionárono cos custos asumidos polos feirantes, que desincentivan a súa presenza. A este respecto, pediron que o goberno local revise os prezos e facilite o acceso dos operadores, para manter a tradición e a diversidade de actividades.
Barcia asegurou que o PP aposta pola música en galego, pero tamén se comprometeu, de chegar ao goberno, a combinar esta aposta cunha maior presenza de artistas de proxección nacional e internacional. “Santiago é a capital de Galicia e merece unha programación á altura”, afirmou.
O grupo municipal popular concluíu o seu balance asegurando que a cidade “perdeu oportunidades e relevancia”, e comprometeuse a recuperar o nivel das festas se accede á alcaldía no 2027.
