A Revista Galega de Educación (RGE), editada polo Movemento de Renovación Pedagóxica Nova Escola Galega (NEG), vén de publicar o seu número 92, centrado nos retos e oportunidades da dixitalización no ensino galego. O monográfico aborda en profundidade o programa E-Dixgal, promovido pola Xunta de Galicia, e ofrece unha análise ampla e crítica sobre o uso das novas tecnoloxías nas aulas.
A presentación oficial desta nova entrega terá lugar en Santiago de Compostela, o martes 17 de xuño ás 19:00 horas, na libraría Couceiro, un dos espazos de referencia do pensamento pedagóxico e cultural da cidade. O acto está aberto ao público e diríxese especialmente á comunidade educativa, aos colectivos vinculados á innovación no ensino e a todas aquelas persoas interesadas no debate arredor da dixitalización nas escolas galegas.
Coordinado por Jesús Rodríguez Rodríguez, Silvia López Gómez, Camino Pereiro González e Denébola Álvarez-Seoane, o número recompila achegas de profesionais de diferentes etapas educativas, así como análises teóricas e experiencias de aula. Entre os textos destacados figura o documento Medidas necesarias para mellorar a dixitalización nas aulas galegas, no que se propoñen liñas de actuación para unha integración tecnolóxica sostible, crítica e adaptada ao contexto educativo galego.
Outros artigos abordan cuestións como a formación dixital do profesorado, a alfabetización tecnolóxica na primeira infancia, a aplicación de metodoloxías STEM na secundaria, a incorporación da intelixencia artificial nas dinámicas escolares ou os desafíos da educación dixital no medio rural.
A publicación tamén inclúe unha entrevista con Manuel Area e Jordi Adell, especialistas recoñecidos no ámbito da tecnoloxía educativa, que ofrecen unha visión crítica sobre a estratexia dixital institucional e alertan sobre os riscos dunha implantación sen base pedagóxica clara.
Desde a NEG subliñan que este número da RGE chega nun momento de especial relevancia, xa que a expansión das tecnoloxías nos centros educativos está a suscitar debates intensos sobre o modelo de escola que se quere construír. Neste sentido, consideran que o monográfico pode ser unha ferramenta útil para fomentar a reflexión e o diálogo informado na comunidade educativa galega.
