Un incendio rexistrado na madrugada deste sábado activou todas as alarmas no centro histórico de Santiago, ao declararse nunha vivenda da rúa Algalia de Abaixo, unha das máis coñecidas da zona vella. Segundo informaron fontes dos servizos de emerxencias, o lume foi detectado arredor das 03:15, momento no que os Bombeiros de Santiago recibiron o aviso e se desprazaron ao lugar dos feitos.
As lapas orixináronse nunha primeira planta, nun inmoble situado nunha área especialmente sensible pola súa alta densidade de edificacións antigas, moitas delas con interiores de madeira que favorecen a propagación do lume. Con todo, a rápida intervención do corpo de bombeiros permitiu controlar o incendio en pouco máis de trinta minutos.
Segundo se puido confirmar, a vivenda atopábase baleira no momento do suceso, polo que non se produciron danos persoais. A planta afectada, onde se iniciou o lume, resultou gravemente danada, aínda que o resto do edificio non sufriu consecuencias de consideración grazas á rápida actuación dos equipos de emerxencias.
As causas do incendio están aínda por determinar. Axentes da Policía Local e da Policía Nacional accederon ao inmoble durante a mañá para realizar unha primeira inspección e comezar a investigación que aclare a orixe do suceso.
Unha veciña da zona explicou a Xornal de Compostela que “había moito fume e cheiraba moi mal”. Asegura que se trata dunha casa okupa e corrobora que o fume era perceptible dende fóra da vivenda, o que podería ter acelerado a chamada aos servizos de emerxencia.
