InicioDEPORTESO novo Pavillón de Vite ábrese ao público tras a súa reforma...

O novo Pavillón de Vite ábrese ao público tras a súa reforma cunha especialización no hockey sobre patíns

O Concello e o Goberno central invisten 1,6 millóns de euros nunha remodelación que aposta pola eficiencia, a accesibilidade e a práctica deportiva inclu

Publicado o

Xornal de Compostela

O Pavillón de Vite estrea unha nova etapa tras ser sometido a unha reforma integral que transforma o espazo nunha instalación especializada na práctica do hockey sobre patíns, cun forte compromiso pola eficiencia enerxética, a accesibilidade e a calidade deportiva. O recinto foi inaugurado este venres coa presenza da alcaldesa de Santiago, Goretti Sanmartín, e do delegado do Goberno en Galicia, Pedro Branco.

O investimento, que suma 1,3 millóns de euros procedentes do programa estatal PIREP e 300.000 euros achegados polo Concello, permitiu modernizar por completo a infraestrutura: foron renovadas as instalacións e o mobiliario, mellorada a eficiencia enerxética e realizada unha intervención específica para garantir a inclusión de persoas con mobilidade reducida. Entre outras melloras, instaláronse 28 paneis solares, unha nova rampla de acceso, aseos adaptados e bancadas con prazas reservadas.

A rexedora compostelá destacou que o novo pavillón responde ao obxectivo de dispoñer de “instalacións deportivas de alta calidade e que estean á altura do que Santiago merece”. Tamén se referiu ao vernizado da pista, á incorporación dun novo reloxo eléctrico e a unha rede móbil que facilita o uso segundo as distintas actividades.

A concelleira de Deportes, Pilar Lueiro, explicou que a reforma foi deseñada tendo en conta as necesidades específicas do hockey sobre patíns, modalidade principal que se practica no recinto. Segundo apuntou, trátase dun exemplo de como as melloras nas instalacións existentes poden transformarse en espazos deportivos practicamente novos sen renunciar ao seu uso histórico.

Pola súa banda, o delegado do Goberno, Pedro Branco, salientou que esta actuación exemplifica o interese do Executivo central por promover “instalacións máis sustentables, eficientes e acolledoras para os deportistas”. Lembrou ademais que Santiago recibiu 7,5 millóns de euros en total dos fondos PIREP, dentro dun programa que permitiu financiar 80 actuacións en toda Galicia cun orzamento de 77 millóns de euros.

A inauguración do Pavillón de Vite marca así un novo fito na política municipal de reforzo das dotacións deportivas, coa vontade de garantir o acceso a espazos seguros, inclusivos e preparados para os retos do deporte actual.

ÚLTIMAS

O empresario detido en Santiago está vinculado a unha rede de fraude na venda de bebidas alcohólicas

O empresario que foi detido pola Unidade Central Operativa (UCO) da Garda Civil o...

Galiza Nova protestará este vindeiro luns contra a Medalla de Ouro de Galicia da Xunta á princesa Leonor

Galiza Nova, organización xuvenil do BNG, protestará este luns, 14 de xullo, en Santiago...

Festas do Apóstolo: Sés, Baiuca e atraccións na Alameda cun cartel anunciador homenaxeando a Castelao

As festas do Apóstolo arrincan a próxima semana en Santiago de Compostela, cunha aposta...

Coñecemos o primeiro coworking rural de Galicia que deu renda solta á creatividade do campo

Hai lugares que nacen da necesidade e medran coa forza da comunidade. No pequeno concello...

A compostelá Alejandra Neira logra o ouro para Galicia e reafírmase como gran promesa do ciclismo santiagués

A santiaguesa Alejandra Neira foi a gran protagonista da Selección Galega no Campionato de...

O PP acusa o Concello de Santiago de suspender a final da Copa de fútbol por non mercar os trofeos

O Partido Popular de Santiago acusou este xoves ao goberno local, liderado polo BNG,...

Diego Uzal reforza o mediocampo da SD Compostela para a tempada 2025/26

A Sociedade Deportiva Compostela comeza a perfilar o seu novo proxecto deportivo coa incorporación...