A concelleira do Partido Popular de Santiago, Nerea Barcia, visitou a parroquia da Barciela, onde mantivo un encontro coa asociación veciñal para recoller as súas demandas e denunciar a situación que, segundo afirmou, evidencia o “abandono do rural” por parte do goberno municipal.
Entre as principais queixas da veciñanza, Barcia destacou o mal estado do firme na pista de Benavente e no cruce co aeroporto, que carecen de asfaltado e presentan fochancas de grandes dimensións, segundo afirmou. A edil insistiu en que a situación “supón un risco para a seguridade viaria” e que algúns arranxos recentes agravaron os problemas, provocando incluso asolagamentos en vivendas durante episodios de choiva intensa.
A popular tamén fixo referencia á ausencia de beirarrúas e pasos de peóns en boa parte da parroquia, e reclamou a instalación dunha marquesiña para o transporte escolar, que permita ao alumnado do CEIP e do IES agardar o autobús “en condicións dignas e seguras”.
Barcia apostou tamén por dotar a zona de infraestruturas de lecer, como parques infantís e espazos biosaudables, que permitan “compartir espazos interxeracionais e alternativos á tecnoloxía”. A súa proposta pasa por impulsar un proxecto consensuado coa veciñanza, algo que, asegura, “non forma parte da axenda do actual goberno local”.
A concelleira criticou, ademais, a falta de mantemento das gabias e das ribeiras dos ríos, cuestión que, ao seu ver, agrava os problemas de drenaxe e xera riscos ambientais. “É evidente que levamos dous anos cun goberno que non fixo nada polo rural”, sinalou, engadindo que a resposta habitual ante estas demandas segue a ser a mesma: “non hai cartos”.
“Os veciños quéixanse, pero non reciben nin respostas nin solucións”, lamentou Barcia, quen lembrou que o PP leva tempo trasladando estas peticións, sen que se materialicen en actuacións concretas. Tamén acusou o executivo municipal de non cumprir os compromisos adquiridos coas parroquias, a pesar de ter declarado en campaña que o rural sería unha prioridade.
A concelleira concluíu afirmando que “a falta de limpeza, tanto no centro urbano como nas parroquias, converteuse nun problema estrutural que o goberno actual non está a abordar“. Para Barcia, esta situación “pon de manifesto que, para os nacionalistas, o rural non existe“.
