A xunta de goberno do Concello de Santiago outorgou a licenza para a obra da reforma interior da Facultade de Medicina a solicitude da Universidade de Santiago de Compostela (USC). Este proxecto, realizado por Elizabeth Abalo Díaz e Gonzalo Alonso Núñez, ten un orzamento de 28 millóns de euros. A reforma integral do edificio organizarase en sete fases para compatibilizar a obra co funcionamento do centro.
A primeira fase afectará á á este da fachada principal, fronte a rúa de San Francisco. Unha vez finalizada quedarán acondicionadas unha área de simulación, varias aulas, o salón de graos, os accesos do salón de actos, a biblioteca, o decanato e a zona administrativa. A obra desta primeira parte executarase en oito meses, cun orzamento de máis de 2,5 millóns de euros. A USC proponse cambiar a organización espacial do edificio cunha distribución departamental e outra por áreas funcionais que se reflicte nas diferentes plantas.
Entre outras cuestións, mantense a área institucional na zona norte e a cafetaría no soto e localízanse de forma lixeiramente independente a área de Anatomía e o Instituto de Medicina Legal (Imelga), por ter certo carácter departamental e necesitar accesos específicos. O resto das áreas funcionais distribuiranse polas plantas, con maior ocupación no baixo.
O acceso institucional permanecerá pola entrada principal, ademais de que se cambiarán as carpintarías e haberá unha recuperación da altura orixinal do vestíbulo para reforzar o carácter representativo. Prevense novas comunicacións verticais, que funcionarán ao mesmo tempo como escaleiras de emerxencia e protección contra incendios. Así mesmo incorporarase un muro técnico que recorrerá a espiña dorsal do edificio para conectar todos os pisos vertical e horizontalmente e resolver as instalacións e o almacenamento.
EDIFICIO DE CASE 100 ANOS
O edificio da Facultade de Medicina rematouse en 1928 sobre un proxecto de 1910 asinado polos arquitectos Fernando Arbós e Tremanti e Isidro de Benito. Situouse na parte posterior do por entón Hospital Real. A súa arquitectura respondía os valores do movemento hixienista. O edificio tivo varias reformas, a de maior calado na década dos 60. A actual obra afectará a máis de 5.900 metros cadrados.
