As Festas da Ascensión 2025 chegan a Santiago con música, tradición e unha programación que, porén, xerou certa polémica. A escasa antelación na publicación do cartel —apenas dúas semanas antes do inicio— e a ausencia de concertos na Praza do Obradoiro son algúns dos aspectos que teñen chamado a atención da veciñanza.
O Concello optou por non incluír eventos no Obradoiro, posiblemente debido ás críticas recibidas tras o concerto da orquestra Panorama o pasado ano, cando se rexistraron danos no pavimento pola montaxe do escenario e preocupacións polo impacto acústico nun espazo patrimonial tan sensible.
Ao saír á rúa para recoller opinións, atopamos que moitas persoas descoñecían o programa das festas. A falta de carteis informativos nas rúas foi unha das principais queixas, sinalando unha deficiente difusión dos eventos.
En comparación co ano pasado, a programación deste ano é percibida por algúns como menos atractiva, a pesar de contar con actuacións destacadas como a das Tanxugueiras na Praza da Quintana. A percepción xeral é que a organización podería mellorar en termos de comunicación e planificación para garantir unha maior participación cidadá.
Para coñecer de primeira man as opinións da veciñanza sobre estas festas, saímos á rúa e recollimos as súas impresións nun vídeo que podedes ver a continuación:
Ver esta publicación en Instagram
Un traballador de limpeza na Alameda describía o programa como “moi malo”, asegurando que “non hai orquestras boas” e que “ao nivel de Santiago, nada”. Lamentaba tamén que outras localidades veciñas “como A Coruña ou Sigüeiro” estean a programar actuacións máis atractivas.
Na mesma liña se expresaban varias mozas entrevistadas tamén no parque da Alameda, que cualificaban o cartel de “pobre” en comparación con edicións anteriores. “Só coñecemos ás Tanxugueiras”, dicían, sinalando que o resto dos nomes non lles resultaban familiares. “O ano pasado houbo a Panorama e outras orquestras, pero este ano nada”, criticaban, e propoñían recuperar formacións como París de Noia, El Combo Dominicano ou Satélites, que consideran máis animadas e populares.
Outro grupo de rapazas amosaba desinterese polo programa musical e recoñecía que non vira apenas publicidade sobre os concertos. “Se houbese cantantes máis coñecidos, como Rosalía, Quevedo ou Aitana, seguro que iríamos”, afirmaban. Tamén indicaban que non chegaran a ver o cartel completo, e que os nomes presentes non lles chamaran a atención.
Pola súa banda, un home entrevistado no mesmo espazo valoraba positivamente a oportunidade de descubrir grupos novos, pero botaba en falta algunha figura de referencia que servise de reclamo principal. “Estaría ben que houbese alguén máis coñecido para atraer xente, e logo coñecer aos demais artistas”, explica. Este veciño tamén salienta a falta de visibilidade do programa, asegurando que só vira información a través dun PDF compartido en redes sociais. “Non vin carteis nin publicidade pola cidade, e iso pode ser un problema”, concluía.
A pesar das críticas, tamén houbo quen destacou o valor de dar espazo a novas propostas musicais. “Está ben que non sexan todos artistas consolidados. Se non os coñecemos, mellor motivo para ir velos, que despois igual son os nomes que están en todos lados”, indicaba o mesmo home, mencionando exemplos de artistas que medraron tras pasar pola Ascensión.
