Este sábado 3 de maio, a partir das 17:00 horas, as instalacións de Enoturismo María Manuela, situadas no lugar do Pazo en Boqueixón, acollerán a cuarta edición de Os Maios “Ó noso xeito”, unha festa que busca poñer en valor as tradicións galegas mentres se fusionan con novas propostas culturais e empresariais. A celebración incluirá degustacións de produtos locais, actuacións musicais en directo e presentacións que amosan o espírito innovador e sostible do proxecto María Manuela.
Os asistentes terán a oportunidade de coñecer as instalacións de Enoturismo María Manuela, que inclúen nove cabanas baixo unha carballeira, unha bodega e unha impoñente plantación de uva albariño. O espazo, caracterizado polo seu compromiso co turismo sostible, tamén contará coa presenza de iniciativas emprendedoras que destacan a identidade local da comarca.
Durante o evento, a responsable de Enoturismo María Manuela, Nieves Millán, presentará as novidades do proxecto, que se distingue por fomentar un modelo de negocio sustentable e respetuoso co medio ambiente. Entre as iniciativas emprendedoras que se darán a coñecer, destacan Klout, que ofrece moda sostible con identidade propia, Mamá Teresa, unha marca de doces artesáns feitos con receitas tradicionais, UllaXtreme, que proporciona experiencias de aventura no río Ulla, e Namente Psicoloxía, un proxecto centrado no benestar e crecemento persoal dirixido por Adriana Rodríguez.
Un dos momentos destacados da xornada será a presentación do libro infantil “Cando era pequena”, escrito polo autor arxentino R.J. Peralta e ilustrado por Blanca Millán. A presentación terá lugar ás 17:45 horas e estará presidida polo conselleiro de Cultura, Lingua e Xuventude, José López Campos, xunto co alcalde de Boqueixón, Ovidio Rodeiro Tato, o secretario xeral da Lingua, Valentín García, e o alcalde de Vedra, Carlos Martínez.
