A Xunta de Goberno Local de Santiago aprobou este luns o inicio do expediente de licitación para o deseño e execución dos espectáculos pirotécnicos das Festas do Apóstolo 2025 e 2026, cun orzamento de 519.138,04 euros. O acordo contempla a realización dos fogos artificiais o 24 e 31 de xullo, desde diferentes puntos da cidade, con espectáculos exclusivos deseñados especificamente para Santiago de Compostela.
En concreto, o espectáculo do día 24 de xullo terá lugar simultaneamente desde tres localizacións: Alameda, Escalinata de Fontiñas (Parque Carlomagno) e Cidade da Cultura, comezando ás 23:30 horas cunha duración mínima de 18 minutos. O do 31 de xullo, tamén ás 23:30 horas, será lanzado unicamente desde a Alameda, con 16 minutos como mínimo.
O contrato inclúe o deseño, produción, montaxe e realización do espectáculo, que deberá cumprir coa normativa vixente en materia de seguridade pirotécnica, especialmente no que atinxe ás distancias respecto de vivendas e instalacións.
CONSULTA AO MERCADO PARA A PLATAFORMA LOXÍSTICA
Outro dos asuntos tratados na sesión foi a solicitude á sociedade Mercagalicia da convocatoria dunha consulta preliminar ao mercado co obxectivo de coñecer o interese e as condicións das operadoras loxísticas na futura xestión da plataforma loxística de mercadorías para a Cidade Histórica.
Esta actuación enmárcase no convenio asinado en xaneiro de 2023 entre o Concello, o Consorcio da Cidade e Mercasa, e foi avalada na última reunión da comisión de seguimento celebrada o 28 de marzo de 2025.
Mercagalicia, entidade participada polo Concello de Santiago (51%) e Mercasa (49%), asumirá a consulta sen custo económico para a administración local, en base ao artigo 115 da Lei de Contratos do Sector Público. A consulta busca achegar información sobre o modelo de xestión, fases de implantación, tipoloxía de mercadorías, custes, rendibilidade e alternativas operativas para o sistema de distribución urbana.
A iniciativa complétase cun estudo paralelo de demanda comercial na Cidade Histórica, coordinado pola Sociedade UNINOVA, e conta cunha subvención europea de 3,9 millóns de euros, no marco do Plan de Recuperación, Transformación e Resiliencia. As obras da plataforma están a ser executadas por TRAGSA, empresa pública estatal, e xa está aprobado o proxecto de urbanización exterior.
OUTROS ACORDOS
A Xunta de Goberno acordou tamén persoarse en seis recursos contencioso-administrativos interpostos contra resolucións da Axencia de Turismo de Galicia relacionadas coa cancelación de vivendas de uso turístico.
Así mesmo, autorizouse o inicio do procedemento de recepción das obras da primeira fase do viario A Pajuela – Campo da festa de Marrozos, dentro do POS+2022-Adicional.
Por último, tomouse coñecemento da concesión de dúas subvencións en especie por parte do Consorcio de Santiago: unha para a rehabilitación do Arco de Mazarelos (188.986,87 €) e outra para a rehabilitación de fontes e elementos patrimoniais (211.686,24 €), incluíndo actuacións como a da Fonte das Praterías.
