A rúa do Pombal reabriu hoxe ao tráfico, despois de dez meses de obras cun investimento superior aos 760.000 euros, co obxectivo de mellorar a calidade do espazo público, a accesibilidade e os servizos urbanos. A actuación tamén permitirá recuperar a partir da semana que vén os itinerarios e frecuencias habituais das sete liñas de autobús urbano que se viron afectadas durante o desenvolvemento da obra.
Segundo informou o Concello, a intervención supuxo a eliminación de barreiras arquitectónicas, a ampliación das beirarrúas e a creación dun itinerario peonil máis cómodo e seguro, especialmente adaptado para persoas con mobilidade reducida ou que empreguen carriños. A nova configuración da rúa inclúe unha plataforma única, con circulación segregada entre vehículos e peóns, mobiliario urbano renovado, pequenas zonas axardinadas e espazos para descanso.
Desde o punto de vista das infraestruturas, renováronse por completo as redes de saneamento e abastecemento, mellorouse a iluminación pública con sistemas máis eficientes e tamén se actuou nas redes de telecomunicacións e gas.
Unha das principais novidades é a incorporación dun carril refuxio para bicicletas en sentido subida, situado na marxe dereita da rúa, pegado ao muro da Alameda. Esta medida busca facilitar a mobilidade ciclable e incrementar a seguridade viaria das persoas que utilizan a bicicleta neste tramo.
No tocante ao transporte público, as liñas 4, 8, 9, C2, C4, P1 e P7 recuperarán as súas paradas e itinerarios previos á Semana Santa. Desde Tussa informaron que o Sistema de Axuda á Explotación da rede de autobuses está a ser actualizado e que se reforzará a comunicación coas persoas usuarias ao longo da semana.
Coa reapertura, a circulación de vehículos en dobre sentido tamén quedará restablecida. A beirarrúa máis ampla, situada na marxe esquerda, xunto ás vivendas e establecementos, acollerá o tránsito peonil principal, consolidando así unha rúa máis amable e funcional, segundo indicaron desde o goberno local.
Esta actuación enmárcase dentro das políticas municipais para avanzar cara a unha cidade máis accesible, sostible e integradora, e forma parte da estratexia de recuperación e posta en valor dos espazos públicos do casco urbano de Compostela.
