O Concello de Santiago de Compostela porá en marcha o vindeiro 22 de abril unha campaña de información e control sobre a recollida de residuos, centrada especialmente na cidade histórica e o Ensanche, co obxectivo de mellorar os hábitos de separación e reducir os incumprimentos na xestión do lixo.
A iniciativa, presentada este mércores polos concelleiros Xesús Domínguez, responsable de Sustentabilidade Ambiental e Servizos Básicos, e Xan Duro, de Mobilidade e Convivencia, contará coa participación de dous profesionais ambientais que realizarán un labor informativo e de control de martes a sábado, en horario de 19:00 a 24:00 horas.
Segundo explicaron os responsables municipais, estes informadores ambientais percorrerán as rúas para difundir os horarios de depósito, explicar as normas de separación de residuos e detectarán os puntos negros de incumprimento. Se se constata reincidencia tras tres advertencias, remitirán un informe á Policía Local, que poderá iniciar un procedemento sancionador.
A campaña terá unha duración inicial de tres meses e financiarase con cargo ao canon de concienciación de Urbaser, empresa concesionaria do servizo de recollida. Segundo Domínguez, esta acción responde á necesidade de fomentar unha Compostela máis sostible: “Sabemos que a maioría da xente cumpre coas normas, pero temos que actuar polos casos reiterados que prexudican ao conxunto da veciñanza”.
As entidades veciñais, comerciais e hostaleiras participantes na xuntanza mantida este mércores co Concello acolleron positivamente a proposta e acordaron reunirse de novo un mes despois do inicio da campaña para avaliar o seu impacto e funcionamento.
A intervención dos informadores non se limitará só á cidade histórica e ao Ensanche, aínda que serán as zonas prioritarias debido ao maior volume de lixo e á alta concentración de infraccións segundo o servizo municipal de recollida.
Ademais, o Concello recorda que calquera incidencia relacionada co lixo pode ser comunicada a través do formulario web en santiagosostible.gal, co obxectivo de implicar á cidadanía na mellora continua da limpeza e xestión dos residuos.
A campaña chega nun momento clave, coa vista posta na implantación plena da nova ordenanza de residuos, actualmente en tramitación, que busca reforzar a separación da fracción orgánica e o cumprimento das directivas ambientais europeas.
