A Asociación Área Empresarial do Tambre (AAET) acollerá a partir de mañá, luns 24 de marzo, a exposición de pintura AlegrArte, da artista María José Rodríguez, no Centro Empresarial do Tambre. A inauguración está prevista para as 20:00 horas e a mostra permanecerá aberta ao público ata o 18 de abril, en horario de luns a venres de 9:00 a 14:00 horas e de 16:00 a 20:00 horas. A organización recomenda contactar previamente para concertar a visita, chamando ao 981 55 28 50.
A exposición reúne vinte obras nas que a autora conxuga técnicas como a acuarela, o acrílico e o óleo, incorporando elementos de reciclaxe como fíos, teas e latas, e empregando soportes variados, desde lenzos a tablillas. Rodríguez busca, con esta proposta, conectar coa mirada do espectador desde múltiples dimensións: “Transmítese emoción, sentimento, sensibilidade, pero tamén conciencia ecolóxica e valores universais que defenden a reutilización e o respecto polo medio ambiente”, explica a autora.
UNHA MOSTRA QUE NACE DA PEDAGOXÍA E PAIXÓN CREATIVA
Formada en Pedagoxía pola Universidade de Santiago de Compostela, a artista leva anos integrando o seu labor pedagóxico coa súa inquietude artística. A través da exposición AlegrArte, quere trasladar a alegría que lle produce o acto creativo, xa sexa a través da pintura, a escultura ou outras formas de expresión. “Procuro transmitir esa emoción ao espectador e provocar algún tipo de resposta. Ese feedback é o que realmente pecha o ciclo da obra”, afirma.
TRAXECTORIA ARTÍSTICA CON RAÍCES GALEGAS
Natural da Coruña pero criada en Ponferrada, María José Rodríguez reside actualmente en Vilagarcía de Arousa, desde onde mantén unha activa participación en certames e exposicións de toda Galicia. Desde 2019, ten participado en numerosas mostras colectivas e individuais, tanto dentro como fóra da comunidade.
O Centro Empresarial do Tambre, ademais do seu labor como espazo profesional e formativo, vén apostando pola difusión cultural, acollendo actividades que achegan a arte e a creación ao tecido empresarial da comarca compostelá. Con esta mostra, a entidade reforza esa liña de traballo, abríndose ao diálogo entre mundo artístico e empresarial.
A entrada á exposición é libre e gratuíta.
