A Policía Nacional detivo este mércores en Santiago de Compostela ao presunto autor de seis roubos cometidos na cidade a persoas de idade avanzada o pasado mes de febreiro. Tal e como informou a Policía, as investigacións que segue a UDEV da Brigada de Policía Xudicial da Comisaría de Santiago deron como resultado a detención dun home como presunto autor de seis feitos delituosos violentos.

En concreto, os feitos cometéronse de forma continuada na tarde do xoves 27 de febreiro na zona do barrio de Fontiñas e Sar entre as 18.30 horas e as 23.00 horas aproximadamente. Os roubos consistiron en tiróns de bolso de forma sorpresiva a persoas que transitaban soas pola vía pública ou se dispuñan a entrar nos portais das súas vivendas.

Segundo destacou a Policía, a maioría das vítimas eran persoas de idade avanzada e vulnerables das que o ladrón se aproveitaba das dificultades de mobilidade á hora de reaccionar ante este tipo de feitos.

Nun dos casos, a caída ao chan da vítima tras o tirón produciulle lesións de gravidade, polo que tivo que ser intervida cirurxicamente tras ser trasladada ao Complexo Hospitalario Universitario de Santiago (CHUS). Despois de levar a cabo as investigacións correspondentes, localizouse ao presunto autor e procedeuse á súa detención na Estación Intermodal da capital galega este mércores cando se dispuña a coller un tren de media distancia.