O Concello de Santiago abriu o prazo de inscrición para os Obradoiros de Acollemento Lingüístico (OAL), unha iniciativa que busca facilitar a aprendizaxe do galego a persoas doutras comunidades lingüísticas. Estes cursos presenciais están pensados tanto para quen se achega por primeira vez á lingua como para aquelas persoas que xa realizaron unha primeira aproximación e queren seguir mellorando as súas competencias.
A formación divídese en dous niveis, un de iniciación, dirixido a persoas sen coñecemento previo de galego, e outro de continuación, para quen xa ten unha base e quere progresar.
Cada obradoiro contará con 36 horas de formación, distribuídas en dúas sesións semanais. O grupo de iniciación terá clases os luns e mércores pola mañá (11:00 a 12:30 horas), mentres que o grupo de continuación asistirá ás sesións en horario de tarde (19:30 a 21:00 horas).
INSCRICIÓN ATA O 24 DE MARZO
O período de inscrición permanecerá aberto ata o 24 de marzo ás 12:00 horas. O proceso é gratuíto e pode realizarse a través do formulario dispoñible na páxina web delingua.santiagodecompostela.gal. As prazas, limitadas a 25 persoas por curso, asignaranse por orde de inscrición.
Unha vez pechado o prazo, as persoas admitidas recibirán unha confirmación por correo electrónico. As aulas desenvolveranse no Espazo Apego, situado na rúa República do Salvador, número 12. Como peche do obradoiro, organizarase unha actividade especial, como unha ruta ou visita guiada pola cidade.
CALENDARIO DOS OBRADOIROS DE PRIMAVERA
As sesións terán lugar entre marzo e xuño, en datas previamente establecidas: 26 e 31 de marzo; 2, 7, 9, 23, 28 e 30 de abril; 5, 7, 12, 14, 19, 21, 36 e 28 de maio, e 2, 4, 8, 11, 16, 18, 23 e 25 de xuño.
