O portavoz do PP de Santiago, Borja Verea, volveu a demandar á alcaldesa, Goretti Sanmartín, que condene “o ataque machista da CIG”, que hai unhas semanas difundiu un cartel no que aparece, a modo de caricatura da conselleira de Política Social, Fabiola García, un debuxo dunha muller cun bolso de marca que afirma que lle “matan” as rebaixas.
Así, o líder do PP local apuntou que “esperaba un pouco máis de valentía”, xa que, reiterou, pediu ao concello de Santiago “que defendese a unha veciña de Santiago”. “Unha alcaldesa muller que defendese a unha veciña de Santiago ante un ataque machista, pero non puido ser; que pena, verdade?”, lamentou o tamén deputado popular no debate dunha proposición non de lei do pleno do Parlamento.
Xa a semana pasada, tres concelleiras do PP compostelán — María Baleato, Olalla Otero e Nerea Barcia– reprocharon que “en pleno 2025 sexa necesario dar unha rolda de prensa” para “esixir a quen se proclaman como abanderadas do feminismo que condenen un ataque machista a unha muller”.
Pola súa banda, a rexedora compostelá defendeu que a crítica a calquera muller cargo público “debe ser feita en base a aquelas políticas que desenvolva e non sobre calquera outro tipo de bases”. “Evidentemente, esa é a crítica única que ten lóxica”, resolveu.
