As concelleiras de Santiago de Compostela expulsadas do PSOE Mercedes Rosón e Mila Castro consideraron que “sería escandaloso” que o seu expediente concluíse antes que outros que levan meses pendentes como os que afectan o alcalde do Carballiño, Francisco Fumega, ou ao exministro de Transportes, José Luís Ábalos.
Rosón e Castro pronunciáronse deste xeito ao ser preguntadas polas declaracións efectuadas polo secretario provincial do PSOE coruñés, Bernardo Fernández, nas que asegurou que a comisión de ética e garantías ten un prazo duns 15 días para analizar as alegacións dos catro edís composteláns expulsados para despois decidir se esta medida é definitiva.
“Se é certo que o obxectivo, como vimos denunciando desde hai semanas, é que nos manden para casa, pois posiblemente si entenderiamos que chegase esta semana, se non, non se entendería”, sostivo Mila Castro. Ademais, na rolda de prensa e interpeladas polas críticas das direccións do PSOE local, provincial e galego á carta asinada por centenares de cidadáns, entre eles o expresidente da Xunta, Emilio Pérez Touriño, en apoio a Mercedes Rosón, Mila Castro, Gonzalo Muíños e Marta Álvarez, as edís consideraron que a dirección ten “un serio problema” se non quere entender a mensaxe lanzada por estas persoas.
Deste xeito, tras mostrar o seu sincero agradecemento aos asinantes, dixeron que “reducir e devaluar” unha iniciativa cidadá como esta resulta “totalmente inexplicable” e terá consecuencias no presente e no futuro do PSOE tanto na provincia como na cidade. Ademais, despois de que a dirección do partido dixese que só asinaban a carta “tres militantes”, Mila Castro, que foi secretaria xeral do PSOE compostelán, lembrou que dos 300 militantes que ten o partido na cidade “uns 50” rubricaron a misiva.
APOIOS IMPORTANTES
Entre eles, figuran, ademais do propio expresidente Touriño, personalidades como o exalcalde de Santiago, Xosé Sánchez Bugallo; a exdiputada Noa Díaz; a que foi secretaria de Organización do PSOE compostelán Cermen Fernández Morante; así como a exportavoz socialista no concello de Teo Uxía Lemus da Igrexa, o exsenador Xavier Carro, a exconcelleira Begoña Rodríguez e outros socialistas como o que desempeñou o cargo de director xeral de Política Financeira da Xunta na etapa de Touriño, Eugenio García Lalinde; ou a que foi directora xeral de Lingua no mesmo goberno da Xunta, María Sol López Martínez, entre outros.
Por último, preguntadas polas palabras nas que o actual secretario xeral do PSOE compostelán Aitor Bouza recoñeceu “erros” por ambas as partes, Mila Catro preguntou se eses erros son o esixir a acta das concelleiras, a decisión de “cesar ao persoal eventual” a pesar de que fai un gran labor ou “obrigar aos concelleiros do grupo a bloquear a ordenanza que completaba a regulación das vivendas de uso turístico”. “Nós imos ser expulsados, se o comité de ética non o remedia, por non asistir á convocatoria dunha reunión á que nós mesmos explicamos que non iamos asistir por considerar que era nula de pleno dereito”, incidiu.
Por último, volveron a confirmar a súa intención de esgotar o mandato como concelleiras aínda que teñan que ir para o grupo de non adscritos —no que non contarían con asignación económica—, así como a súa vontade de defender os seus dereitos ante a xustiza se é necesario.
