O Concello de Santiago conta cun total de 64 pisos turísticos con autorización municipal, segundo se recolle na relación de establecementos deste tipo que dispoñen de título habilitante municipal que publicou o consistorio local na súa páxina de Transparencia. Ningún deles, destacou Raxoi, se sitúa no ámbito do Plan especial de protección e rehabilitación da cidade histórica (PE-1), cuxa normativa non permite a utilización das vivendas para a actividade turística.
Preguntado respecto diso este luns en rolda de prensa, o edil de Urbanismo, Iago Lestegás, detallou que no que vai de 2025 rexeitáronse 50 recursos que se presentaron contra declaracións de ineficacia de comunicacións previas. Tamén se incoaron 14 novas declaracións de ineficacia de comunicacións previas. Así mesmo, concretou que o seu departamento ditou 10 resolucións en expedientes de reposición da legalidade con orde de cesamento definitivo en cinco días.
Doutra banda, sobre o Rexistro da Xunta, onde hai uns 750 pisos inscritos, Lestegás afirmou que están a diminuír desde xuño, pero entre febreiro e marzo “non houbo cambios”, polo que sostivo que está “bastante estabilizado”. Nesta liña, asegurou que o consistorio local ten constancia de “24 baixas de oficio tramitadas pola Xunta”; delas, 21 en 2024. En todo caso, apuntou que 24 son as que constan de oficio, pero hai outras que notifican pero que descoñecen se é de oficio ou a petición do interesado.
TAXA TURÍSTICA
Por outra banda, a preguntas dos medios na rolda de prensa posterior á xunta de goberno local, a portavoz municipal, Míriam Louzao, insistiu en que o executivo espera a colaboración do sector para “poder sacar adiante” a taxa turística. Neste sentido, insistiu en que o Goberno local “defende claramente” este imposto que, lembrou, “existe en moitas cidades”. Así mesmo, sobre a nova Asociación de Turismo e Hostalaría de Santiago, da que asegurou que “aínda” non ten “coñecemento oficial”, sinalou que é “unha asociación máis do sector”, que “nunca deben ser un problema, senón parte da solución”. Nesta liña, subliñou que en próximas semanas presentarán ao sector o borrador da ordenanza, para o que espera a colaboración de sector.
