A Igrexa parroquial de San Xulián de Bastavales acolleu esta fin de semana a tradicional ofrenda floral do Concello de Brión en homenaxe a Rosalía de Castro. O evento reuniu a preto dun cento de persoas na tarde do pasado sábado e contou coa actuación artística e musical de Esperanza Mara, no espectáculo titulado ‘Ao son das campás de Rosalía’.
O acto comezou co repicar das campás de Bastavales, seguido da intervención da concelleira de Cultura, Sandy Cebral, quen recitou versos de Rosalía e agradeceu a colaboración de todas as persoas implicadas na organización do Mes de Rosalía no municipio. Durante a súa intervención, referiuse ao debate sobre se a escritora chegou realmente a escoitar as campás de Bastavales: ‘Hai quen asegura que o seu poema procede dun estribillo popular que a escritora recolleu. Outras persoas din que as coñeceu en Santiago, a través dos relatos dun sacerdote de Bastavales. Se me preguntades a min, eu penso que si que as escoitou cando era unha nena e pasaba días na casa que a súa familia tiña en Soigrexa, xusto aquí enfronte’.
O alcalde de Brión, Pablo Lago, e a concelleira de Servizos Sociais, Rosa Romero, realizaron a tradicional ofrenda floral ante a figura da escritora, un xesto ao que se sumaron moitos dos asistentes, que aproveitaron a ocasión para dar lectura a fragmentos da obra de Rosalía.
A continuación, a soprano Esperanza Mara protagonizou unha experiencia musical e artística, interpretando diferentes campás ao tempo que cantaba nove fragmentos de poemas de Rosalía de Castro. A interpretación estivo acompañada de xogos de luces e referencias visuais que evocaban as emocións da autora. O evento pechouse coa lectura do poema ‘Campanas de Bastavales’, que puxo o broche final a unha homenaxe centrada na figura da escritora galega.
